Hri kai mi sang ruk tling dawn hnai tawh

Serchhip District-a COVID-19 hri kai hmuh tawh chu 5998 an tling tawh.

Niminpiah January 1, 2022 khan Serchhip District-ah Rapid Antigen Test hmangin hri kai mi 22 lai hmuh niin an zinga 11 te chu Chhingchhip khua an ni a, East Lungdar-ah hri kai mi 5 hmuh niin Serchhip khawpui chhungah hri kai mi 4 leh Sailulak khua ah hri kai mi 2 hmuh an ni. 

Nimin khan hri kai mi 39 lai hmuh belh leh an ni bawk a, heng hri kai hmuhchhuah zingah hian Serchhip bakah Thenzawl, Chhingchhip, East Lungdar leh Keitum khua te telin tunhnaiah hri kai hmuh hi an pung leh hret hret niin a lang.

Niminpiah khan Serchhip District-ah hri kai enkawl dam awm lovin nimin khan mi 15 enkawl dam an ni ve leh thung a. Heti hian nizan thleng khan Serchhip District-a hri kai hmuhchhuah tawh chu 5998 niin an zinga 5754 te chu enkawl dam ni tawhin hri kai zinga za zela 95.93 te chu enkawl dam an ni tawh a, hri kai enkawllai 224 la awmin hri kai zingah mi 20 lai an boral tawh a, District hrang hrang zingah hri kai enkawllai tam lamah Serchhip District hi pathumna a ni leh tawh a ni.

Comments

Popular News (Last 30 Days)

Vawiin-ah HSSLC Exam result