Kum 15-18 te Jan. 6 atangin hri danna pe dawn

Kum 15 leh 18 inkar te tana COVID-19 Vaccine pek tur chu Serchhip District-ah tun thla ni 6 khian a hawnna neiin ni 15 thlengin pek zawh hman tura ruahmanna siam a ni.

Rampum-a COVID-19 vaccine pek hna kalpui mekah nimin atang khan kum 15 leh 18 inkar te vaccine pek hna hi kalpui tan a ni a, Mizoram-ah pawh Aizawl-ah bul tan ni mah se Health Department hotute chuan hunpui lai te a nih avangin District lamah chuan ni 3 hnua kalpui tan ve turin ruahmanna an siam a. Hemi ang hian nimin khan Serchhip District Bawrhsap hovin Health Department hotute chuan Vaccine pek dan tur hi sawihona neiin Serchhip District-ah chuan tun thla ni 6 khian a bul tanna nei turin ruahmanna an siam a, Vaccine hi CHC,. PHC leh Sub-Centre in School base-a an pek tura ruahman niin tun thla ni 15 ah chuan zofel hman turin ruahmanna siam a ni a, hri danna pek dan tur Schedule kimchang chu School Education Department hotute nen la ruahman leh tur a ni  dawn a, School kal ve lo te leh harsatna dang nei tan a hrana hri danna pekna hmun hi ruahman leh theih tur a ni bawk ang.

Rampum-a kum 15 - 18 inkar te tana Vaccine pek hna kalpui mekah hian tun thla ni 1 atang khan Co-WIN a inziahluhna hun hawn ni tawhin kum 2007 leh a hma lama piang te tan Vaccine hi lak theih a ni dawn a, Vaccine la turte tana ID Card hman thin te nei remchang lo tan School ID pawh tun tumah hian hman theih a ni dawn a ni. Mizoram-ah hian kum 15 leh 18 inkarte hnenah ‘COVAXIN’ pek an ni dawn a, hei hi a hmaa hri danna lo lak tawh ‘COVISHIELD’ nen a inan loh avangin lak kawp theih a ni dawn lo a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar