Mamit-ah CMO Office leh ANM building hawng

Health Minister Dr. R. Lalthangliana chuan nimin khan Mamit ah CMO Office Building leh ANM School Building-te a hawng.

Nimin a heng building thar hawnna ah hian Health Minister Dr. R. Lalthangliana chuan Aspirational District Mamit hmasawnna leh tihchangtlunna turin Central Sawrkar leh State sawrkar atangin nasa taka thuam a nih thu sawiin, an hmalakna avangin Aspirational District an nih tirha 94 position kha dinhmun sang tak taka an invawrh chho ta chu thawktute hmalakna fakawm a tih thu a sawi a. Kan hnathawh that avanga Central Sawrkar atangin tanpuina Incentive Award dawng tur leh District dangte entawntlak khawpa hmala tura chahin, “Mamit District hi kan potential Area-in a zir avangin hmasawnna tam takin min hmuak mek,” a ti a, ramdang, Bangladesh nena insumdawntawnna tura hmalakna pawh chhunzawm zel a nih dawn thu a sawi bawk. Health Minister chuan Hospital-a thawk Doctor leh Nurse te chu an thiamna mai nilo an tawngkam khat chauh pawh damlote damna tling a ni tih hre thar leh turin a fuih bawk.

Nimin a hawn tak Mamit Chief Medical Officer (CMO) Office hi State Priority Programme (SPP), 2018 - 2019 Fund atanga sak niin Zamzo Engineering Construction & Consultancy, Aizawl te'n a sak hna hi an thawk a. Sanctioned Amount cheng nuai 250 niin nikum October 8 khan sak zawh a ni. A building hi Ground Floor-ah Vehicle Parking, Canteen, Driver's room, Toilet block te awmin First Floor-ah CMO room, MEI Section, EPI Section, NPCD Section, NHM Section, School Health Section leh Toilet Block-ah te then a ni a. Second Floor hi SMO Room, Drug Inspector's Toom, Tobacco Section, NCD Section, Establishment Section leh Toilet Blocks -ah te then a ni bawk.

Auxiliary Nurse Midwife (ANM) Building hi Ministry of Health & Family Welfare (Nursing Division), Centrally Sponsored Scheme (CSS) hnuaia Fund dawn atanga sak niin Zamzo Engineering Construction & Consultancy, Aizawl niin cheng nuai 150 senga an sak a ni. A building hi Ground Floor, First Floor leh Second Floor-ah te then nikum December 3 khan sak zawh a ni a. Ground Floor-ah Recreation room, Waiting room, Warden Office, Dining Hall, Kitchen leh Toilet Block te awmin First Floor leh Second Floor-ah Double Bedded room 4 leh Toilet Block a awm ve ve a ni.

Nimin a heng building thar hawnna puala inkhawm hi Health Department-a Principal Director Dr. F. Lianhlira chuan kaihruaiin Mamit District Bawrhsap Dr. Lalrozama bakah Lalremmawii, Jt. Director Nursing) leh Dr. C.Lalsangzuala, Member, H&FW Board leh sawm bik te'n thu thu an sawi bawk a ni.