Hri kai enkawllai 4398 zet awm leh tawh

Mizoram hmun hrang hrangah COVID-19 hri kai hmuhchhuah an pung chho leh mek a, nimin tlai thleng khan Mizoram-ah COVID-19 hri kai enkawllai mi 4398 an awm mek a ni.

Niminpiah Pathianni khan Mizoram-ah Sample 2694 enfiah niin heng atang hian hri kai mi 518 zet hmuhchhuah an ni a, Sample enfiah atanga za zela 19.23 te chuan hri an kai a ni. Niminpiah khan ZMC-a RT-PCR Laboratory-ah Sample enfiah awm lovin Fluorescent Immunoassay Test hmanga Sample enfiah a awm lo bawk a, District hrang hranga TrueNat Laboratory zingah Mamit District-ah Sample 37 enfiah niin hri kai mi 2 hmuh an ni.

District hrang hrangah Rapid Antigen Test hmangin Sample 2657  enfiah niin heng atang hian hri kai 516 hmuh an ni a, Champhai District-ah hri kai hmuhchhuah tam berin 216 zet hmuhchhuah an ni a, Aizawl District-ah hri kai mi 110 hmuhchhuah awm bawkin Mamit District-ah 106, Hnahthial District-ah 31, Saitual District-ah 20, Serchhip District-ah 8, Siaha leh Kolasib District-ah 7 ve ve Lawngtlai District-ah 6 leh Lunglei District-ah hri kai mi 5 hmuh an ni bawk.

Nimin khan Mizoram-a hri kai mi 214 te chu enkawl dam an ni ve leh bawk a, heti hian nimin tlai thlenga Mizoram-a hri kai hmuh tawh chu 1,46,045 niin an zinga 1,41,086 te chu enkawl dam an ni  tawh a. Hri kai hmuhchhuah atanga za zela 96.60 te chu enkawl dam ni tawhin hri kai enkawllai 4398 zet an awm leh tawh a, hri kai zingah mi 561 an boral tawh bawk a ni. District hrang hrang zingah Aizawl chu hri kai enkawllai tamna ber niin 1342 enkawllai an awm a, Serchhip District in dawtin 931 enkawl mek an ni bawk.