Kum 15-18 te Vaccine pe ve tan dawn

Ramchhung hmundangte rualin Vawiin, January 3, 2022 hian kum 15 leh 18 inkarte tan CO-VID-19 hri danna pek tan a ni dawn.

Health Department hotute sawi danin kum 15 leh 18 inkar hri danna pek tur Covaxin dose 67,000 hi Aizawl a lo thleng tawh a. Mizoram-a kum 15 leh 18 inkar awm zat hi Registrar General of India-in a chhut dan chuan 67,000 a ni a, anni hi Covaxin dose hmasa pek phawt an ni ang. Vawiin-a hri danna pek runpui hi PC Girls School-ah neih tan tura ruahman a ni a, a bulhnai a Sub-Centre a inziaklut mi 10 leh 20 inkar vel pek phawt an ni ang. Vawiin atang vek hian online leh hri danna pekna hmunah hming pekluh tan theih a ni anga. District khawpui-ah te leh thingtlang hmun dangah chuan hemi hnu deuhah hian kalpui chhoh ve a ni dawn a ni.

Hei bakah hian January ni 10 atang khian kum 60 chin chunglam, natna benvawn neite tan inven lehzualna turin hri danna dose khat pek tan leh turin ruahmanna siam a ni a. Mizoram bikah chuan kum 60 chunglam natna benvawn nei hri danna pek tur hi mi 21,600 an awm niin Registrar General of India chuan a ngai a. Chutiang zat dose chu sawrkar laipuiin a la rawn thawn leh thuai tura ngaih a ni.

Hri danna pek hna thawh mekah December ni 31 thleng khan hri danna dose 13,20,272 pek chhuah tawh a ni a. Dose hmasa zawk dawng tawh hi mi 7,30,811 an ni a, dose la kim tawh chu mi 5,89,461 an ni.