Kangmei venna a hmalak dan tur ngaihtuah

Serchhip District Level Committee on Fire Prevention chu nimin khan thukhawmin kumin Thal chhunga kangmei venna kawnga hmalak dan turte an ngaihtuah.

Serchhip DC Meeting Hall-a Serchhip District Level Committee on Fire Prevention thutkhawm hi an Chairman leh District Bawrhsap Kumar Abhishek chuan kaihruaiin khua a Thal chho tan leh dawn ta a, kangmei laka kan ram a him theih nana thapui thawha inbuatsaih a lo hun leh ta tih a sawi a. Nikum lama ram kang vanga harsatna kan tawh dante rilru-a hre chungin kumin ah ruahmanna tha tak neih tum turin Member kalkhawmte a sawm bawk.

He hunah hian Member Secretary leh Thenzawl DFO Lalbiakchama Chawngthu chuan kum hmasa lama hmalak dan leh State Level Committee rorel te sawi hawnna nei lehin kumina hmalak dan tur sawiho zui a ni a. Committee chuan kangmei tichhuaktute lakah a na thei ang bera dan hmanga hmalak leh khauh taka invenna dan kenkawh nise an ti a. Mipui inzirtirna chi hrang hrang pawh uar lehzuala neih tha tiin, Disaster Zonal Officer zawng zawngte chu kangmei chhuah palha hma an lak nghal dan tur duansa (Action plan) neih tir ni se an ti bawk. Lo hal hun bituk khauh taka kenkawh te, meikawng sial ngei ngeina dan te leh khaw tinte hmalak dan vil zui dan turte pawh an sawiho a ni.

He Meeting hian Fire Prevention Week, 2022 hman dan tur relin, February 7 leh 12 chhunga hman tura ruahman niin kangmei venna lama thawk tha khua te hnena lawmman siam leh te pawh an rel a ni.