MJA kum 50 tlin lawmna Serchhip-ah nei

Mizoram Journalist Association (MJA) kum 50 tlin lawmna chu nimin khan Mizoram District hrang hrangah neih a ni a, MJA Serchhip District pawhin MJA Golden Jubilee lawmna hi Serchhip Press Club-ah an nei a ni.

MJA Golden Jubilee lawm bultanna puala Serchhip District-a hun hman hi Serchhip Bialtu MLA Lalduhoma chuan hmanpuiin MJA Golden Jubilee hriatrengna puala lungphun chu a hawng a, hemi hnua Serchhip Press Inkhawm neih zui ah Serchhip Bialtu MLA chuan Serchhip District MJA ten an Golden Jubilee an lawmna a hmanpui thei chu lawmawm a tih thu sawiin, District hrang hrang Journalist Association te MJA-a an inchhun-khawmna ah MJA Serchhip District te a bul tantu an ni pawh lawmawm a tih thu a sawi.

Serchhip bialtu MLA chuan MJA Serchhip District ten Project Site Visit an nei thin leh hri leng avanga tunhnaia an nei hlei theilo tih a lo hriat thu sawiin, hetianga Project Site Visit hi neih tha a tih thu leh kan Bial chhungah pawh sawrkar sum tam taka hmalakna chhunzawm mumalloh leh chhawr tlakloh a awm nia a hriat thu a sawi a, heng te pawh hi la tlawh ho tha a tih thu a sawi a. Project tam tak chu a hunlaia vil a nih loh avangin a nih tur ang a ni phak thinlo tih sawiin, kan bial chhungah thil tha, ro tling awm se a duh thu leh chutianga tlawh tur chuan MJA te nen thawhho tha a tih thu bakah YMA Sub-Hqrs. ten hemi kawnga hma an lo lak tawh thinna te pawh tha a tih thu a sawi a. Miharsa te tana MJA in thilpek hlana hma an lak thinna te pawh tha a tih thu leh chhunzawm zel tha a tih thu a sawi bawk.

MLA Fund chungchangah COVID-19 avangin nikum lamah an dawn tur zinga nuai 40 sawrkar in a cut sak tih sawiin Serchhip Bialtu MLA chuan, kumin ah pawh 1st instalment chiah an la dawn thu a sawi a. Heng an sum hmuh hi a hma lama pek tura an lo ruahman tawh ah pek mek a nih thu leh tunah hian 2nd instalment an dawn hun tur pawh an la hriat loh thu bakah an hmu dawn em tih pawh an la hriat loh thu a sawi bawk.

MJA Golden Jubilee lawmna puala Inkhawm hi MJA Serchhip District President Kapliana Pachuau chuan kaihruaiin nizan khan Serchhip Tarpi tlang-ah Jubilee Mei det neih zui a ni a, Jubilee mei det hi MJA Serchhip District-a member kum upa ber RC. Hranghmingthanga chuan a dep kai a ni.

MJA hi kum 1972 March 23 khan din a ni a, kum 2007 khan Mizoram District hrang hranga Journalist Association te chu MJA-ah hian an in-chhungkhawm a, tunah hian Mizoram District 11 zinga 8-ah District MJA hi dingin Serchhip District-ah hian member 15 an awm mek a, an zinga 11 te hi Serchhip-a awm niin Thenzawl-ah 3 leh North Van-laiphai-ah pakhat an awm bawk a ni.