Chanchin lawrkhawm :

Bawrhsap Pisa sawihona nei

Aizawl Bawrhsap Pisapui kang ta chung-chang chu nimin khan Chief Minister Zoramthanga hovin a Pisa-ah INTACH Mizoram Chapter hruaitute nen sawiho a ni a, INTACH Mizoram Chapter te chuan Aizawl Bawrhsap Pisapui kang ta chu pawi an tih takzet thu sawiin, State chhunga Heritage building conservation chungchangte an sawipui a. Pisapui chungchangah hian a ngai ang chiaha sak that leh ngei nise tih an duh thu an sawi bawk a ni. Chief Minister chuan INTACH Mizoram Chapter te rawtna chu a Cabinet Member puite lo sawiho pui a tum thu a hrilh a ni.

FCI Kudam sawnna tur en

Chief Minister Zoramthanga hovin nimin zing khan Rangvamual-a Ch. Saprawnga Truck Terminal chu Food, Civil Supplies and Consumer Affairs Minister K. Lalrinliana leh AMC Mayor Lalrinenga Sailo te chuan an tlawh. FCI Kudam sawnna tur hmun remchang awm thei hmun hrang hrangah zawn mek a ni a, chung zing ami Ch. Saprawnga Truck Terminal hi Chief Minister ho hian enfiah niin Engineer te'n godown sakna atan a rem theih dan tur chik zawka lo zirchiang tura tih a ni.

CSR Fund-a hnathawh tlawh

Nikum lama Lunglei District chhunga Angan-wadi panga cheithat nana cheng nuai 6.50 lo pe tawhtu Central Public Sector Enterprise te zinga mi Central Warehousing Corporation (CWC) hotute chuan nimin khan Lunglei tlawhin nikum lama CSR Fund an pek hmanga hmalakna te an tlawh a. Tun dinhmunah Anganwadi Centre dang 25 CSR kaltlanga cheitha leh tura ruahmanna kal mekin he project hi tih hlawhtlin ngei an tum thu an sawi bawk.

Mizoram DGP sawn a ni

Mizoram-a Police hotu lu ber DGP SBK. Singh IPS chu Delhi-a awm tura sawn a ni a, a aiawh tur hian Delhi atangin Devesh Chandra Srivastava chu rawn dah a ni. Mizoram DGP thar tur hi IPS niin 1995 Batch a ni.

ZPM in Office hawnna nei

ZPM Party chuan kumin atana Aizawl-a an party Office hawnna leh mithar lawmluhna hun chu nimin khan an hmang a, he hun hi ZPM Leader Lalduhoma chuan kaihruaiin ZPM Working President K. Sapdanga chuan kumthar thuchah a sawi a, ZPM Treasurer C. Laltanpuia chuan an party zawm thar te a lawmlut thung a ni.

MZP Pisapui hawnna nei

Mizo Zirlai Pawl (MZP) chuan Aizawl-a MZP Pisapui kumin atana hawnna hun nimin khan hmangin an President Lalnunmawia Pautu chuan kum 2022-ah MZP chuan Zirlaite leh ram leh hnam tan theihtawp a chhuah dawn tih sawiin, Mizo zirlai harsate tanpuina turin Trust Fund siam an tum thu a sawi bawk.