Health Minister in Lengpui Airport tlawhin khualzin te lo dawnsawn dan tur a enfiah

Health Minister Dr R. Lalthangliana chuan Inrinni khan Lengpui Airport-a COVID-19 Screening Point chu tlawhin, Omicron variant lo thleng thei kara thlawhtheihna hmanga khualzin lo thleng hlim te dawnsawn dan tur leh buaipui dan tura ruahmanna a endik a, Lengpui Airport chu uluk taka vil a tul thu a sawi.

Health Minister Dr. R. Lalthangliana chuan, khawvel leh India ram hmun tinah COVID-19 hrik (variant) thar ‘Omicron’ a leng mek tih sawiin, khawvel ram hrang hrangah leh India ram State hrang hrangah inkhuahkhirhna leh inkaihhruaina thar an hmang leh tawh tih a sawi a, “Mizoram-ah pawh mithiamte rawn chungin sawrkarin Mizoram pawn atanga lo lutte lo endik dan tur leh dawnsawn dan tur ruahmanna a siam thar leh a, awmze nei leh mumal taka kan inpuahchah hi thil pawimawh tak a ni,” a ti a. “Lengpui Airport hi kan luhka pawimawh, a bik takin India ram pawn atanga lo haw te leh thenawm hnaivai State tih loh India ram hmun dang atanga khualzin te an lo luhna hmun a nih avangin uluk taka kan vil a tul a ni,” a ti bawk a. Lengpui Airport cheithat hna kal lai mek tithuanawp si lova hmalak a ngaih avangin a hmun ngeiah department hrang hrang aiawhte nen an en ho thei chu lawmawm a tih thu a sawi bawk.

He hunah hian Health Department, Disaster Management & Rehabilitation Department leh Home Department bakah GAD (Aviation Wing) leh District thuneitute pawh telin, Lengpui Airport-ah thlawhtheihna rawn tum a tam leh tak avangin khualzin lo thleng te Sample test awlsam leh hun heh lo zawka kalpui a nih theih dan turte enin ruahmanna siam a ni a, Lengpui Airport Ground Floor-ah thlawhtheihna lo thleng hmasa a chuangte sample test a nih chhunga midang, thlawhtheihna danga lo thleng ten harsatna nei lova an lo thut hahdamna tur te, kum upa/tar chak lo leh damlo Wheel chair-a nawr ngaite sample test na tur bik ‘Special Booth’ leh positive an awm palha dah hranna tur Isolation Tent ruahman a ni tawh a ni.

First Floor-a passenger nawlpui sample test na booth hrang hrang te endik niin positive te dah hranna tura ruahman sa pawh mumal leh felfai zawka ruahman dan tur te siam a ni a. Thawktu mihring indaihlohna phuhruk dan tur pawh sawiho niin ruahmanna siam a ni a, khualzin lo thleng zinga hri kai hmuhchhuah te phurhchhuah dan tur leh an inenkawl chhunzawm dan tur te pawh he hunah hian sawiho niin a buaipuitu tur bik thuneitu ten rang takin hma lak nghal a nih tur thu an sawi bawk. Paramilitary Forces zinga hri kai hmuhchhuahte an hotu ten an ngaihsak tawk loh thu leh zan thleng thlenga hruai loh a an awm thin chuan Airport Security thleng a nghawng theih thu Airport viltu ten an sawi a, Home Department chu a tul angin hma la nghal turin an ti.