Latest News

Serchhip District-ah COVID-19 hri kai hmuh-chhuah tam ber ni thleng leh

Serchhip District-ah COVID-19 hri kai an pung zel a, nimin khan hri kai mi 256 zet hmuh belh leh niin Serchhip District-ah ni khat-a hri kai hmuh tam ber ni a thleng leh a ni.

Nimin a Serchhip District-a hri kai hmuhchhuah zinga 99 te hi Bungtlang khua ami te an ni a, Thenzawl-ah hri kai 39 hmuh niin Lungpho-ah 29, East Lungdar-ah 22, Sailulak-ah 18, Ngentiang leh Rullam-ah 12 ve ve, Hualtu-ah 8, Sialsir khua ah 6, Serchhip-ah 4, Piler-ah 3 leh Chhiahtlang leh Mualcheng khua ah pahnih ve ve te an ni a, tun tum hi Serchhip District-ah ni khat a hri kai hmuhchhuah mi za hnih aia an tam vawi khatna a ni bawk.

Nimin vek khan Serchhip District-a hri kai enkawl mi 67 te chu anmahni enkawlna hmun atanga chhuahtir an ni thung a, heti hian nizan thlenga Serchhip District-a COVID-19 hri kai hmuhchhuah chu 6681 an tling tawh a, an zinga 5875 te chu enkawl dam an ni tawh a, hri kai enkawllai 786 la awmin hri kai zingah mi 20 an boral tawh a ni.

Tunhnaia Serchhip District-a COVID-19 hri kai hmuhchhuah tamna Piler leh Lungpho khua ah te chuan hri kai hmuhchhuah an pun avang leh hri leng darh zel tur venna atan nasa zawka hmalakna atan Serchhip District Kumar Abhishek chuan heng khua te hi hmun khuahkhirh bik (Restricted Area)-ah a puang ve leh bawk.

Comments

Popular News (Last 30 Days)