Chalfilh tlang-a In thiat lo tura ngenna ngaihtuah

Mizoram sawrkar chuan December 16, 2021 khan Chalfilh tlang, Vanzau-a In sakte chu thiat lo tura ngenna National Green Tribunal (NGT) Eastern Zone Bench, Kolkata-ah ngenna/dilna a thlen tawh a, hearing pawh neih a ni tawh.

Hemi chungchanga thudawn danin, Mizoram sawrkar chuan NGT-ah heng In sak te thiat lo tura ngenna, Miscelaneous Appeal (MA) a thehluh hnuah January 7, 2022 khan Hearing neih niin, Court lam thuchhuak erawh hriat theih a la ni lova. NGT-in thiat tura thupek a chhuah Chalfilh tlang-a In sak hi tun thlengin thiah a la ni lo a ni.

Mizoram sawrkarin Chalfilh tlang chhipa khualzinte hipna tura Tourist Destination project a kalpuiah Forest Clearance dil lo leh nei hmasa lovin hma a la a, In engemaw zat a sak avangin Centre for Environment Protection chu August 25, 2017 khan NGT-ah an zualko a. NGT chuan November 17, 2021 khan thupek chhuahin, sawrkar hmalakna awm tawhte chu thla khat chhunga thiata thianfai vek tur leh January 7, 2022-ah hmalak dan a thlalak nen NGT-a thehlut turin Mizoram sawrkar a hriattir a ni.

Forest Minister TJ. Lalnuntluanga chuan Chalfilh tlang-a Tourist Resort chungchanga NGT-in thupek a chhuah tawh chu Chief Minister duh dan angin NGT thupek awih tho si a, Mizoram sawrkarin hma a lak tawhna te thiat lova thupek awm sa tidanglam turin NGT ngen ni se an tih thu November 29, 2021 khan MNF Party Office, Mizo Hnam Run-ah a lo sawi tawh a ni.