Health Minister hovin CMO ten COVID-19 hri leng do zel dan tur sawihona an nei

Health Minister Dr. R. Lalthangliana hovin nimin khan Mizoram District hrang hranga Chief Medical Officer (CMO) te chuan COVID-19 hri leng mek chungchanga hmalak dan tur an sawiho.

Biak hmuh theihna hmanga he sawihona ah hian Health Minister Dr. R. Lalthangliana chuan COVID-19 dona kawngah a ki thlak a strategy thlak te a tul em tih te, tul ta se eng hawi zawngin nge strategy thar te kan duan ang tih te ngaihtuah tul tihna avangin he Meeting hi koh a ni tih a sawi a. Tun dinhmunah hripui a darh nasat avangin Health Care Workers te indaihlohna a nasa em em a, hemi phuhru tur hian midang phungbawma han sawm te a tha em tih te pawh ngaihtuahna neih a nih thu a tarlang a. Mizoram COVID-19 dinhmun tlangpui tarlangin, tunlai hian thingtlang lamah COVID-19 hripui a darh nasa mek tih a sawi a, District tina Chief Medical Officer te pawh hripui dona kawnga theihtawp an chhuahnaah lawmthu hrilhin, hun engmaw chen chu kan insanmar a la ngai leh dawn a, ruahmanna felfai tak nen awmze nei tura hma kan lak a tul a ni, a ti a. Thingtlang mipuite hnenah uar lehzuala COVID Appropriate Behaviour leh sawrkar SOP te bakah hri kaite enkawl dan tur hriatthiam awl zawka zirtirna kalpui a tul thu a sawi bawk.

He hunah hian District tin atangin COVID-19 dinhmunte leh a hmachhawnna kawnga hmalak a nih dante, harsatna leh mamawh an neihte report ngaihthlak a ni a, mipuite hnena uar lehzuala hripui chungchang leh a inven dante, damlo enkawl dante inzirtir a tul thu sawi a ni a, thingtlang lamah a bik takin kum upate leh natna benvawn neite zawnchhuah chak a, a tul anga vil zui a pawimawh thu te sawi niin, a bik takin damdawi In leh hmanraw awm that lohna hmuna hri kaite dinhmun uluk taka chik a, ngaihtuahawm deuha an awm dawn chuan a rang lama hmunpuia inthawn a pawimawh thute sawi a ni a. Hmai tuamna (mask) vuah that chu invenna atana pawimawh ber a nih zia mipuite zirtir tam a, Mask vuah uluk tura inzirtir a pawimawh bakah fimkhur taka awm chhunzawm zel a la pawimawh thute sawi a ni a, vaccine la la lote pawh lak tir ngei tura tan lak a tul thu te pawh sawiho a ni bawk.