Khamrang - Sihhmui inkar Rel kawng nakum ah zawh tum

Khamrang leh Sihhmui inkara Rel kawng siam hna thawh mek chu nakum (2023) December thla ah zawhfel hman an tum thu hnathawktute chuan an sawi.

Northern Frontier Railway-in Khamrang leh Sihhmui inkar Rel kawng an siam mek hi niminpiah khan Mizoram Lok Sabha MP C. Lalrosanga chuan a hmunah kalin a tlawh a, he hunah hian Khamrang Station atanga Rel kawng kalna tur leiverh zawh tawh te, Leidawh lai te, Leidawh sang tak tak te leh Mualkhang leh Sairang Rail Station siam hna kal lai mek te chipchiar takin a en a, Parliament Thlasik thut-khawmnaa helai Rel kawng chungchang zawhna a lo zawh tawhte Railway Minister Ashwini Vaishnaw-in a lo chhan tawhte bawhzuiin Railways lam hotute chu Rel kawng siamna hna thawh a nih dante a sawipui bawk.

Lok Sabha MP chuan Railway hotu leh hnathawktute chu a sur a sa hnuaiah rim taka hna hautak an thawh avangin lawmthu a hrilh a. Sairang thlenga Rel kawng siam hna hi thawh zawh a nih hnuah pawh Mizoram chhim lam thlenga survey lo tih tawh anga Rel kawng kaltir tuma hmalak a tum thu a sawi bawk.

Helai hmun hnathawh enkawltu Dy. Chief Engineer Harjimal Meena chuan Lok Sabha MP hi an hnathawh dan te chipchiar taka hrilhin, an hna thawh tawh leh thawh mekte leh harsatna an tawhte a lo sawipui a. Helai Rel kawng March, 2024-a siam zawh hman an tum chu December, 2023-ah zawh hman an tum a ni tih MP hi a lo hrilh bawk a ni.

Rel kawng enkawlna kawnga Consultant Hrangtawna pawhin Rail kawng siam mek chungchangah hian Working Season a rei loh em vang leh zangnadawmna buaipui a ngaih thin avangin duh angin hna a thawh chak theih loh thin thu MP hi a lo hrilh bawk.

Comments

Popular posts from this blog