DIPR leh MJA ten inhlantharna hun an hmang

Department of Information and Public Relations buatsaihin nimin khan I&PR Department-a thawktute chuan Aizawl-a I&PR Auditorium-ah Mizoram Journalists’ Association (MJA) member te nen kum thar inhlantharna hun an hmang.

Nimin a he hun hmanna ah hian I&PR Director Lallianpuii chuan MJA leh DIPR a thawkte chu tum thuhmun neia hnathawk, unau leh chhungkua, hman atanga Vawiin thlenga inhnehnai leh thawkho an ni, a ti a. He an thawhhona boruak tha tak hi ngaiah nei mai lovin, a pawimawhzia leh hlutzia hrethar leh turin a fuih a ni.

Press mite leh DIPR te hnathawh chuan a thleng thui a, Vawiin atan chauh ni lo, nakin hun lo la awm zel tur thlengin mite hnenah thu a sawi thin tih I&PR Director chuan sawiin, Sawrkar leh mipui tana rawngbawl hna hlawk tak an thawk tih hrechiang a, hma lam pana theihtawp chhuah turin a sawm a ni.

He hunah hian MJA President Zonunsanga Khiangte pawhin I&PR Department-in MJA te hamthatna tura hma an lak tawhna leh tun thlenga hma an lak zel chungchangah lawmthu a sawi a. An welfare atana hma an lakna kawngah Journalist Pension Scheme an ngaih pawimawh zia sawiin, tan lakpui turin Department hotute a ngen a ni. MJA President chuan Journalist te leh DIPR mi leh sa ten ram tana an hmalakna tam tak zingah chi leh chi, hnam leh hnam inkara inpumkhatna ‘communal harmony’ pawimawhzia sawiin, hemi kawngah hian sawrkar kaihhruaina hnuaiah nasa lehzuala hmalak tul a tih thu a sawi bawk. He hun hi I&PR Deputy Director PB. Lianthangpuii’n kaihruaiin I&PR Deputy Director Andrew H.Lalremruata’n lawmthu sawiin hun a khar a ni.