Custom Hiring Centre-a hman tur hmanrua vailiam

Mission Organic Value Chain Development North East Region hnuaia Custom Hiring Centre hmanrua chi hrang hrangte chu nimin khan Agriculture Director Rohmingthanga Colney chuan Aizawl-a Directorate of Agriculture kawt atangin a vailiam.

Nimin-a heng hmanrua vailiamna hunah hianAgriculture Director chuan thlai thartute tana nihlawhna Sawrkarin a ruahman thin chu lawmawm a tih thu sawiin, loneituten heng hmanruate hi tangkai taka hmang turin duhsakna a hlan a ni.

Nimin a bungrua an vailiam tak te hi Brush Cutter, Hand Hoe, Chilli Stem Remover leh Plastic Crates te niin Farmer Producer Company (FPC) 4 te hnenah heng hmanrua te hi pek phawt a ni ang a, FPC dang 12 te hnenah pek chhuah leh tura ruahman niin tun tuma dawngtute hi Sawhthing chingtu, Mawmrang Organic Farmer Producer Company Ltd., Pawlrang, Saitual District; Sawhthing chingtu, Sialkal Organic Farmer Producer Company Ltd., Teikhang, Saitual District; Lakhuihthei chingtu, Tuichangral Organic Farmer Producer Company Ltd., Khawhai, Khawzawl District leh Mizo Hmarcha leh Sawhthing chingtu, Zawlnghak Organic Farmer Producer Company Ltd., Rabung, Khawzawl District te an ni.

Heng hmanrua te hi loneituten chak zawka hna an thawh theihna tur leh an thlai chin azira an tharchhuahte tha zawk leh man man zawka an hralhchhuah theihna tura sawngbawlna te a ni a, MOVCD-NER hnuaia in-register, loneituten a thlawnin an hmang anga, FPC-in an enkawl thung dawn a ni.

Comments

Chhiar Hlawhte