COVID-19 hri leng laka Jail a him theih nan hma lain Serchhip District Jail ala him niin hria

Serchhip District Jail hotute chuan COVID-19 hri leng lakah Jail-a awm te an him theih nan nasa taka hma an lak thu sawiin, tun thlengin Serchhip District Jail-ah hri kai an la awm lo nia an hriat thu an sawi.


Serchhip District Jail hi nimin khan LENKAWL chuan tlawhin Serchhip District Jail Superintendent Laldingliana Chinzah chuan hri leng laka Jail a him theih nan kawng hrang hrangah hma an lak thu a sawi a. COVID-19 hri a len tirh lamah Supreme Court ruahman ang leh High Power Committee in ruahmanna an siam angin Serchhip District Jail-a tang mi engemaw zat, thubuai tenau deuh nei te chu Bail a chhuah an nih thu leh Jail tang thenkhat te pawh an tan hun chhung titawia chhuahtir an ni tih sawiin, hemi atang hian Jail chu tih thawl a nih thu a sawi a, Jail tang te tlawh theih hun pawh tihtawp niin Jail a tang turte reng reng chu an luh hmain Rapid Antigen Test hmanga enfiah hmasak zel an ni tih a sawi a, hei bakah hian Jail a tang turte chu Jail-a an luh hnuah sawrkar kaihhruaina siam anga khunghran hmasak zel an nih thu a sawi.

Serchhip District Jail Superintendent chuan hri leng a ziaawm hnuah Jail tang te tlawh theih hun hawn ni tawh mah se tang te leh anmahni tlawhtute hi inhnaih taka inkawm an la phalloh thu pawh a sawi a, Jail tang tlawh theihloh chhunga hman turin Mobile Phone leiin a thlawnin Jail tang te leh an chhungte an inbiak theih dan an ruahman thu a sawi bakah bungrua leh eitur dang tang tlawhtu ten an pek te pawh tih thianghlim hmasak zel a nih thu a sawi bawk.

Hei bakah hian Jail tang mek te thubuai ngaihtuah chungchang ah pawh hma an lak thu sawiin, Court a hruai lovin Video hmangin hearing neih thin a nih thu a sawi a, vanduaithlak taka Jail tang zingah hri kai an lo awm palh a nih pawhin anmahni huamchhung ah inenkawlna tur an ruahman thu a sawi bawk a. Nikum a COVID-19 Vaccine pek laiin Serchhip District Jail-a tang te chu vaccine pek vek an nih thu leh thawktute pawhin vaccine hi an lak vek tawh thu a sawi bawk.

Serchhip District Jail Superintendent chuan Jail-a tang te tan hian Sawhthing hmun an siam thu pawh sawiin, nikum ah Sawhthing man hi a tlakhniam avangin tunah hian quintal 5 vel an chawh tawh thu a sawi a, hemi atang hian Rs. 6000/- vel sawrkar ah an chhunluh tawh thu a sawi a. An hmalakna pakhat Puantah leh puanthui chungchangah nikum ah nasa taka hma an lak thu sawiin, Jail tang convicted te uniform tur an thui chu hmun hrang hrangah an hralhchhuah thu a sawi a, kumin ah pawh he ruahmanna hi kalpui leh tura ngaihtuahna an sen mek thu a sawi bawk.

Serchhip District Jail-ah hian tun dinhmunah tang Mipa 21 awm mekin an zinga 10 te hi an thubuai ngaihtuah lai niin midang 11 te hi thubuai ngaihtuah tawh an ni a, Hmeichhia thubuai ngaihtuah lai mi 5 tang mekin nu te an tan avanga Jail-a awm naupang pakhat a awm bawk a, heti hian Serchhip District Jail-ah hian Mipa 21 leh Hmeichhia 6, an vaiin mi 27 an awm mek a, thawktu hi Superintendent hovin mi 21 an awm mek bawk a ni.

Comments

Chhiar Hlawhte