Chanchin lawrkhawm :

MLP Rules sawihona nei

The Mizoram Liquor (Prohibition) Draft Rules 2020 siam tura Committee din, MLP Rules Drafting Committee chu nimin khan an Chairman Deputy Chief Minister Tawnluia hovin a Pisa-ah an thukhawm a, MLP Rules chu Kohhran hrang hrang leh NGO ten ennawna inrawnkhawmin peihfel vat dan tur ngaihtuah nise an ti. He thut-khawm ah hian Deputy Chief Minister Tawnluia chuan kuthnathawktute, a bikin Hnahlan leh Champhai-a Grape chingtute dinhmun thlirin Rules siamna turah hian hmalak a tul tih a sawi a, Zu leh ruihhlo khuahkhirh kawngah Kohhran leh tlawmngai pawl hrang hrangte nena pheikhai rual taka kalho zel an duh tih a sawi bawk. Nimin a thutkhawm hian MLP Rules kaihhnawih hrang hrangte sawiho a ni a, a rang thei ang bera kut-hnathawktute hmakhaw ngai sia dan siam fel vat erawh tul an tih thu an sawi bawk.

Session neih turin ko

Mizoram Governor Dr. Hari Babu Kam-bhampati chuan Mizoram Legislative Assembly 8-na thutkhawm vawi 9-na chu February 22, 2022 zing dar 10:30 atanga neih turin a ko a, Session neih hun chhung tur leh hun hman dan tur kimchang chu Assembly Speaker Lalrinliana Sailo kaihhruai Business Advisory Committee in an la ruahman dawn a ni. Tun tum Session ah hian kum 2022-23 Budget pharh a ni dawn a, Sawrkarna chelh mektu MNF Party chuan mipuite fairelbel thleng phaka SEDP kalpui anih tur thu an puan lawk tawh avangin mipui ngaihven hlawh hle tura ngaih a ni.

Lawngtlai DC in lawmpui

Mizoram Public Service Commission (MPSC)-in November ni 24, 2021-a Mizoram Civil Services (Combined Competitive) Preliminary Examination a buatsaiha Lawngtlai District atanga hlawhtlinna chang a, Mains Exam thei tura tling, mi 18 chu nimin khan Lawngtlai Bawrhsap Dr. Andrew H. Vanlaldika chuan Lawng-tlai-ah lawmpuina hun a buatsaih.

Transport Department ten inhlantharna an nei

Transport Department-a Officer leh Staff te chuan nimin khan Aizawl-a Directorate of Transport Conference Hall-ah kumin-a an hnathawhna leh hmalak zelna atan inhlantharna hun an nei a, Transport Minister TJ. Lalnuntluanga chuan a hmanpui a ni. He hunah hian Minister chuan mipui rawngbawltu Department an nih anga tan la thar leh turin Transport Department a thawktute a sawm a. Hmalakna pawimawh zual deuh te sawiin mipui te’n Office dawr kher lova Motor Documents leh Driving Licence te an tihfel theihna tura Online Payment buaipui mek pawh hman theih a nih thuai nan chak zawka thawk turin a khawihtute a fuih a. Driving License pek chhuah chungchangah fimkhur zual tur leh, DTO Office tinah Counseling uluk taka kalpui turin a chah bawk.

DC Transfer Order hal

Champhai District NGO Coordination Committee kaihhruaiin nimin khan Champhai Sub-Hqrs.YMA Office-ah Champhai-a tlawmngai pawl hrang hrang hruaitute thukhawmin tunhnaia Champhai DC Maria CT. Zuali hmundanga sawn tura Mizoram Sawrkar thutlukna duh lovin Transfer Order Copy an hal a, Resolution siamin January ni 18 ralhma ngeia Champhai DC sawnna tur thupek chu sut turin Sawrkar an phut tih sawiin, an thilphut tih hlawhtlin anih loh chuan a tul ang zela hmalak nise an ti a, Maria CT. Zuali chhuah chu rem an tih rihloh thu an sawi bawk.

MPSOA Guest House hawng

Home Minister Lalchamliana chuan nimin khan CID Complex, Aizawl-ah Mizoram Police Subordinate Officers' Association (MPSOA) Guest House chu a hawng a, MPSOA General Conference pawh khuallian niin a hmanpui bawk. MPSOA Guest House hi cheng nuai 250 senga sak niin building hnuai ber Basement atanga Conference Hall thlengin chhawng ruk a ni a, MPSOA sum hmangin kum 2016 khan sak tan niin Mizoram sawrkar leh PHQ lam ten sum fai-a doletin mimal te pawhin an remchan ang an thawh bawk a ni.

Hnahthial District MJA hawng

Mizoram Journalist Association (MJA) Hnahthial District chu nimin khan MJA General Hqrs. President Zonunsanga Khiangte chuan Govt. Hnahthial College Auditorium-ah a hawng a, he hun hi Aizawl, Lunglei leh Lawngtlai District-a MJA member te pawhin an hmanpui a ni. Hnahthial-ah hian kum 2009 khan MJA Sub-Division hi hawn a lo ni tawh a, sawrkar inrel-bawlna ah District Hqrs. an nih bakah MJA member awm zatin District MJA member awm tur zat an tlin avangin MJA District hi hawn a ni ta a ni.