Central YMA hruaitu ten Kuhva rah tawlh leh thil pawimawh dang Chief Minister an sawipui

Central YMA hruaitute chuan nimin khan Chief Minister Zoramthanga chu a Office-ah hmuin hlawm lian taka Kuhva tawlhruk chungchang an sawipui bakah sawrkar hmalak dan te an zawt a, Vairengte Aitlang-a Hmunphiah chingtute harsatna leh kawngpui chungchang te pawh an sawipui bawk.

Chief Minister an hmuh hnua thuthar thehdarhtute zawhna chhangin Central YMA President R. Lalngheta chuan dan lova Kuhva tawlhruk a reh theih nan hmalak a tum thu Chief Minister hian a lo hrilh tih a sawi a, “Hei (kuhva rah tawlh) hi dan lova sumdawnna a ni a, chuvangin keini tan chuan phal chi a ni lo a ti,” tiin Chief Minister hian a sawi tih a sawi a, na taka hmalak a tum thu pawh a hrilh tih sawiin, District Magistrate hmalakna pawh tha a tih thu a sawi niin R. Lalngheta chuan a, dan lova Kuhva tawlh chungchangah Central YMA ngaihdan chu ala ngai reng tih sawiin, he thil zirchiangtu tura an ruat te pawhin ngawrh takin hma an la mek tih a sawi bawk.

Central YMA President chuan Vairengte Aitlang-a Mizo huan neitu ten Hmunphiah an chin te an seng theih nan hma lak sak turin Chief Minister hi an ngen tih pawh sawiin, he thil thleng chungchang hi a hma ni in a lo hriat chauh thu Chief Minister hian a lo hrilh tih a sawi a, theih-tawp chhuah a tum thu a lo hrilh niin a sawi bawk.

Heng bakah hian inkalpawhna kawng siam chungchanga Central YMA leh PWD ten thawhhona thuthlung an lo siam angin PMGSY hmanga kawngpui laih te uluk taka vila a tha thei ang bera kalpui a tul thu te, Mizoram in kawngpui tha a neih theihna tura YMA nen tan lak ho zel a tul thu te Chief Minister hian a lo hrilh tih Central YMA President chuan thuthar thehdarhtute hnenah a sawi bawk.

Chief Minister Zoramthanga pawhin Central YMA hruaitu thar te nen inkawmna hun tha tak an nei chu lawmawm a tih thu sawiin, an inkawmna chu hlawhthlak a tih thu a sawi a. Central YMA hruaitu thar te chu an kal zelna turah duhsakna a hlan nghal bawk.

Comments

Chhiar Hlawhte