Chanchin lawrkhawm

 Food Storage Depot tur tlawh

Chief Minister Zoramthanga chuan Sairang Dinthar-a Food Corporation of India (FCI) hnuaia Food Storage Depot, 10,000 MT dawng thei sak tura buatsaih mek chu nimin zing khan a hmunah a tlawh. He project hi Central PWD hnuaia thawh niin, Contractor chu M/s Eastern Trading Corporation a ni a, June, 2021 khan bultan niin, kum hnih chhunga sak zawh tura rua-hman a ni. Chief Minister chuan he hna thawktute chu Thal lai hian hna a tam thei ang ber thawh zawh tum turin a chah a. Electricity leh mamawh dang State sawrkar nen indawr a enho ngaite pawh bawhzui thuai turin a kaihhnawih State department hotute a hrilh bawk a ni. Chief Minister hi FCS&CA Minister K. Lalrinliana leh AMC Dy. Mayor R. Thanglura te'n tawiawmin, FCS&CA, PWD, P&ED hotu te an tel bawk a, CPWD leh FCI hotute'n Chief Minister hi an lo dawngsawng a ni. 


State Handloom Expo nei tan

National Handloom Development Prog-ramme (NHDP) kaltlanga Mizoram Handloom & Handicrafts Development Corporation Ltd. (ZOHANDCO) in Taitesena Hall, Kolasib-a ‘State Handloom Expo 2022’ an buatsaih chu nimin khan bialtu MLA leh Supply Minister K. Lalrinliana chuan a hawng a, State Handloom Expo 2022 chu Mizote hnam ziarang phochhuahna hun remchang a nih bakah kan thiamna leh theihna hmanga siamchhuah hnam thuamte chu rampawn thleng pha sumdawnna kawng sah kuakna hmanraw tangkai tak a nih theih thu a sawi a ni. Kolasib a State Handloom Expo kalpui mekah hian Stall 34 awmin Mizo kutchhuak hnam thuam chi hrang hrang lei theih a phochhuah a ni.


Hri kai tamna khua te tlawh

Khawzawl District huamchhunga Covid-19 Zonal Officer te chuan tunhnaia an District a hri kai hmuhchhuah tamna khaw 15 chu nimin khan tlawhin hri kai hmuhchhuah tam chhan te an zirchian bakah tanpuina an hlan nghal bawk.


Missionary Day hmang

Mizoram-a chanchintha thlen ni, Missionary Day vwi 128-na chu nimin khan urhsun taka hman a ni a, Baptist Church of Mizoram (BCM) chuan he ni pual hian chawhma lamah inkhawm neiin hun an hmang a, hri leng avangin kumdang anga hun hman theih erawh a ni lo thung a ni.

Comments

Chhiar Hlawhte