Latest News

Bawrhsap in VLTF te intuaithar leh tura ngenin, Sumdawnna hmunah khauh zawkin inkhuahkhirh tum a ni

Serchhip District Bawrhsap chuan Serchhip District chhunga Village Level Task Force (VLTF) hrang hrangte chu lehkha thawnin VLTF te intuaithar leh turin a ngen a. COVID-19 hri leng mek avang hian sumdawng leh dawrkar te zawm tur kaihhruaina siam belh leh a ni bawk.

Hemi chungchanga niminpiah a lehkha a tihchhuah ah Serchhip District Bawrhsap Kumar Abhishek IAS chuan Serchhip District chhunga VLTF-te chu NGO aiawh hruaitute inthlan thar avang leh engemaw thil dang avangin hmun thenkhatah hruaitu mumal awm lo leh hnathawk hleithei lovin an awm ni a hriat a ni tih a tarlang a. Hetihlai hian tunhnaiah Serchhip District chu Mizoram chhunga COVID-19 vei hmuhchhuah tam lamah a sang ber niin, hmun hrang hrangah hri kai hmuhchhuah thar zel a ni bawk a, hmun thenkhatah inkhuahkhirhna khauh zawk 'Restricted Area' leh 'Containment Zone' te puan mek zel niin hri in a tihbuai rihloh nia inhriate pawh vawi leh khata hri darh mai thei vek kan nih avangin tan kan lak thar a tul tak meuh tih a tarlang a ni.

Hetiang hi tuna kan dinhmun a nih avangin Bawrhsap chuan, Sawrkar tha tichak turin tualchhung/Grassroot Level-a thawktu VLTF-te an pawimawh hle tih tarlangin “Kan hrileng in min nuaina a rei tawh a, kan tha-te pawh a thum tawh ang. Mahse, he hrileng thawh nawn lehna hi a zualpuí a kiam hma chu insangmar a theihtawp chhuaha hma kan lak thar leh hi a pawimawh a ni,” a ti a. Sawrkar leh mipuite inkara thawktu pawimawh tak VLTF-te hnathawk mumal thei lova an awm chuan he hri avanga kan buaina hi a punlun zel thei tih tarlangin, chuvangin, khaw tina VLTF te, NGO hruaitu inthlan thar ang zela insiam thar tur leh he hri danna tura Sawrkar hmalakna te a túl anga ta taka bawhzui zel tura ngenin a sawm a ni.

Serchhip District Bawrhsap hian thupek thar tichhuakin sumdawng leh dawrkai te zawm tur a tarlang bawk a, he thuchhuah siam ah hian sumdawnna hmun te chu hri kai darh theihna hmun a nih thu tarlangin, dawr zawng zawngah dawrtu te chu lehkhabu (Register) emaw, sulhnu apps emaw hmanga chhinchhiah tur a nih thu leh hand sanitizer chhawp tur a nih thu te, Social distancing tha taka zawm tur a nih thu te, inkaihhruaina lo siam tawh te tha taka zawm tur a nih thu te, CAB tha taka zawm tur a nih thu leh hemi ah hian dawr neitu ten mawh phurin, CAB zawm lo te chu dawr-ah thil lei phalloh tur a nih thu leh sumdawnna hmun leh dawr-ah CAB zawm that a nih leh nih loh endik thin a nih tur thu te a tarlang bawk.

Comments

Popular News (Last 30 Days)