Bawrhsap kalchhuak tur thlahna neih a ni

‘Mizo mipuite nunphungah entawn tur thil tha a tam hle’ - DC

Serchhip District Bawrhsap atanga chhuak mai tur Kumar Abhishek IAS chuan Serchhip chu nuam a tih thu leh a tan chuan a khaw pahnihna (second hometown) ang mai a ni tih sawiin, Mizo mipuite nunphungah entawn tur thil tha a tam hle tih a sawi.

Serchhip District Bawrhsap Kumar Abhishek hi Mizoram-a a awm hun tur a tawp tak avangin tunhnai khan Delhi-ah sawn niin karleh mai khian Serchhip a chhuahsan dawn a, nimin khan Serchhip-a sawrkar Department hrang hrang hotute chuan Serchhip DC Meeting Hall-ah amah thlahna hun hi an hmang a, he hunah hian Bawrhsap kalchhuak tur Kumar Abhishek IAS chuan Serchhip chu nuam a tih thu leh a tan chuan a khaw pahnihna (second hometown) ang mai a ni tih a sawi a. DC Office-a a thawhpui Officers te leh thawktu dangte thawhpui nuam a tih thu leh Head of Offices te pawh hnathawhpui nuam leh fel tak tak an nih thu a hrilh bawk.

Mizo mipuite nunphungah entawn tur thil tha a tam hle tih sawiin Bawrhsap chuan, Mizo nun dan a ngaina hle tih a sawi a. Chutihrualin siamthat ngai laite pawh a awm ve bawk nia a hriat thu tarlangin, Officer te chu mipuite mamawh dik tak uluk taka zirchianga, hmasawnpui dan ngaihtuah tlat zel turin a chah a, “Thuneihna hi sawrkar hna kan thawh chhan a ni lova, mawhphurhna zawk hi kan thawh chhan a ni. Mipuite nuna awlsamna thlen sak hi kan tihhlawhtlin tum bulpui ber a ni zel tur a ni,” tiin Serchhip District-a awm mek Officer te chu anmahni zawn theuhva mipuite tana malsawmna thlen theitu an ni vek tih a sawi a, “Nangni in in thawh loh chuan thawktu dang an awm tawh chuang lo a ni, tiin fuihna thu nen a thlah a ni.

Nimin-a Bawrhsap thlahna hun hi Addl. DC Lalmuansanga Ralte chuan kaihruaiin Kumar Abhishek chu hnathawhpui nuam leh hriatna zau tak nei, theihtawp chhuaha ram tana hnathawk mi nia a hmuh thu a sawi a. Hripui vangin mipuite nen intlawhpawhna hun tam a nei lova, mipuite pawhin a thawhrim zia an hriatpui lo mai thei tih sawiin, “Nitin-a a hnathawk hmutu kan ni a, Serchhip District tan hian a thawkrim hle, COVID-19 dona kawnga sawrkar sum nilo, Corporate Social Responsibility sum min hmuh sak tam ziate hi fak a phu takzet a ni,” a ti a, Serchhip Bawrhsap hna a thawh hmaa hma a lo lak tawhna thenkhat te a tarlang bawk. He hunah hian Officer hrang hrang ten Bawrhsap kalchhuak tur thlahna leh an ui thu sawiin, thlahna thilpek an hlan bawk a ni.

Nimin vek khan Serchhip NGO Coordination Committee chuan Bawrhsap kalchhuak tur Kumar Abhishek hi a chenna In-ah an thlah bawk a, he hi hi NGO Coordination Committee Chairman Kawlthuama chuan kaihruaiin MUP atanga tel Lalhmangaiha Chawngthu chuan thlahna thu a sawi bawk a ni.