Chanchin lawrkhawm :

DGP in Larsap a kawm

Mizoram Police hotu lu ber, Director General of Police (DGP) kalchhuak tur SBK Singh IPS chuan nimin khan Mizoram Governor Hari Babu Kambhampati chu Raj Bhavan-ah kawmin Mizoram-ah kum 2 leh thla 5 chuang a awm chhungin dan leh thupek kengkawhtu Mizoram Police te thuamchak leh tih hmasawnna kawng ah hlawhtlinna tam tak a awm tih a sawi a. DGP a nih chhhung hian Mizoram Police ten hmasawnna lian tak tak an nei tih a sawi bawk. DGP hna a chelh chhungin Mizoram Police-a a thawhpuite, a hnuailam atanga a hotulu zawng zawng te nen thawhhona duhawm tak an nei thin tih sawiin, Mizoram sawrkar tana theihtawp a chhuahna kawngah pawh sawrkar hotulute thlawpna a dawn thin avangin lawmthu a sawi bawk. SBK Singh IPS hian August 8, 2019 khan DGP hna a rawn zawm a, Governor chuan Mizoram-a a awm chhungin tha taka a hna a thawh avanga lawmawm a tih thu a sawiin, a hna thar pawh tha taka thawk chhunzawm turin duh-sakna a hlan a ni.


SEDP kalpui dan tur swiho

Nimin khan Chief Minister Zoramthanga hovin MNF Party MLA te chu Aizawl-ah thu-khawmin kumin a sawrkar Flagship Programme SEDP kalpui dan tur an sawiho a, MNF Legislature Party Secretary L. Thangmawia'n a sawi danin, SEDP hi kumin-a kalpui tur a ni a, sum harsatna karah pawh mipuite tana tangkai tur berin a theih anga kalpui nise an ti a, khawpui chhunga SEDP kalpui dan turte pawh sawiho a ni a, MLA te hian rawtna hrang hrang an nei bawk a ni.

Hei bakah hian tunhnaia Deputy Chief Minister hova Political Party aiawh ten MLA bial hming thlak chungchang an lo sawiho tawh te chu MNF MLA te hian an sawiho a, khaw-chhak atanga kuhva rah tawlhluh chungchang te, tunlai Politics boruak, hri leng dinhmun leh Mizoramsawrkar hmalak zel dan turte pawh an sawiho bawk a ni.


Task Group din thar a ni

Mizoram Chief Secretary leh SDMA State Executive Committee Chairman ni bawk Renu Sharma IAS chuan COVID-19 hripui leng hma-chhawnna kawngah damdawi In hrang hrangte inpuahchahna leh Oxygen Plant te bakah hripui leng dona atana mamawh chi hrang hrang dinhmun vil turin Task Group on Monitoring of Health Infrastructure for COVID-19 a din a, Planning & Programme Implementation Secretary Lal-malsawma chu Chairman niin Dr. Lalnuntluangi, Medical Officer, Planning, DHS chu Member Secretary a ni a, Member mi 4 ruat an ni bawk.


Vaccine pek viltu tur din

COVID-19 hripui leng hmachhawnna kawngah Vaccine pekchhuah leh a dinhmun vil turin leh COVID-19 Control Room hrang hrangte vil turin Mizoram Chief Secretary leh SDMA State Executive Committee Chairman ni bawk Renu Sharma IAS chuan Task Group on Monitoring of Immunization and Control Room Operations a din a. ATI Director Arun Mishra chu Chairman niin Pritank Kishore, Asst. Commissioner-I (Aizawl) chu Member Secretary niin Member atan mi 3 ruat an ni bawk.


MNF sawrkar an ning niin sawi

Congress Party Spokeperson PC. Laltlan-sanga chuan nimin khan Serlui Congress Block Leaders Meet Vairengte-a neih chu hmanpuiin MNF kum thum sawrkar chu sawrkar hmasa ai khan mipuiin an ning tawh zawk niin a sawi a, “MNF sawrkar hi an vanduai hle a. Party ngaihsak lo sorkar hnathawk leh neutral te pawh hian an ning viau tawh a. Congress sawrkar kum 10 kalta ai khan nin an hlawh tawh zawk,” a ti.

Comments

Chhiar Hlawhte