Kum 2020 aiin 2021-ah Serchhip District Police thubuai ziahluh 28 in a tam zawk

Kum kalta (2021) chhung khan Serchhip District chhunga Police Station hrang hrangah thubuai 111 ziahluh niin heng zinga 94-ah te chuan Chargesheet thehluh a ni tawh a, thubuai ziahluh zingah hian rukruk leh inrawk thubuai a tam ber a, kum hmasa aiin thubuai ziahluh pawh nasa takin a pung bawk a ni.

Serchhip SP Office atanga thu kan dawn danin nikum chhung khan Serchhip District chhunga Police Station hrang hrang ten IPC hnuaiah thubuai 85 an ziaklut a, heng an thubuai ziahluh ah hian rukruk leh inrawk thubuai 39 zet ziahluh niin IPC hnuaia thubuai ziahluh atanga za zela 45.88 zet a tling a, kumdang ah pawh rukruk leh inrawk thubuai hi thubuai ziahluh zingah a tam pawl a ni deuh reng a ni.

Chhinchhiahna atanga a lan danin IPC hnuaiah nikum chhung khan Serchhip District-ah lirthei chetsualna thubuai 9 ziahluh niin heng zinga tum 8-ah chuan thihna a thleng a, mi vau leh tihthaih kaihhnawih ah thubuai 8 ziahluh ni bawkin midang chunga sualna lantir kaihhnawih ah thubuai 7 lai ziahluh a ni bawk a. Kangmei chhuak kaihhnawih ah thubuai 6 ziahluh ni bawkin tang tlanchhuak kaihhnawih ah thubuai pakhat ziahluh a ni a, heng bakah hian thubuai pahnih khat ziahluh hrang hrang pawh awmin intihhmingchhiat kaihhnawih ah thubuai pakhat ziahluh a ni bawk.

Nikum chhung vek khan Non-IPC hnuaiah thubuai 26 ziahluh a ni bawk a, heng zingah hian zu leh a kaihhnawih thubuai 9 telin ruihhlo kaihhnawih ah ND&PS Act hnuaiah thubuai 9 bawk ziahluh a ni a, naupangte mipat hmeichhiatna kaihhnawiha venhimna dan, POCSO Act hnuaiah thubuai 7 ziahluh ni bawkin Arms Act hnuaiah thubuai pakhat ziahluh a ni bawk. Non-IPC hnuaia thubuai ziahluh ah hian ND&PS Act leh MLP Act hnuaia thubuai ziahluh pakhat tih loh ah chuan Chargsheet thehluh fel vek a ni tawh bawk.

Nikum chhunga Serchhip District-a Police ten thubuai an ziahluh hi nikum hmasa (2020) aiin 28 zetin a tam zawk a, nikum hmasa a thubuai ziahluh zawng zawng 83 niin nikum-ah 111 zet ziahluh a ni a. Nikum chhunga thubuai ziahluh zawng zawng 111 atang hian 94-ah Chargesheet thehluh ni tawhin convict erawh 27 chauh ala awm a, Pending Trail 65 zet la awmin thubuai 8-ah chuan Final Report thehluh a ni tawh a, Pending Investigation 9 la awm bawkin Case Discharge 2 a awm bawk a ni.