Chanchin lawrkhawm :

Bank hmalakna thlirho

Champhai District Consultative Committee (DCC)/District Level Review Committee (DLRC) chu nimin khan Champhai-a District Bawrhsap Maria CT. Zuali hova thukhawmin September 2021 quarter tawp thlenga an District chhunga Bank hrang hrangte hmalak dan an thlirho a. He huna tarlan a nih danin September 2021 quarter chhunga Champhai District-a Bank hrang hranga pawisa dahluh leh pekchhuah tam zawng inthlauhna khaikhinna, Credit Deposit Ratio/CD Ratio chu 48.36% a ni a, June 2021 quarter tawpa CD Ratio 43.14 % aiin 5.22 % in a pung mahse hei hian CD Ratio bituk zat 60 % chu a phak lo a ni. Hei bakah hian 2021-2022 Financial Year chhunga Annual Credit Plan (ACP) hnuaia hnathawhte thlirho ni bawkin, Priority Sector atana target cheng nuai 13010.70 atangin cheng nuai 7073.23 (54.36 %) hu tihhlawhtlin a ni. Champhai District-ah hian Bank Branch 17 awm mekin, Public Sector Bank 5, Private Sector Bank 5, Regional Rural Bank 6 leh State Cooperative Bank pakhat te an ni.

Raltlan te dinhmun thlirho

Nimin khan Lawngtlai-ah Lawngtlai District Level Committee on Myanmar Refugees chu an Chairman leh District Bawrhsap Dr. Andrew H. Vanlaldika hovin an thukhawm a, he hunah hian an District chhunga raltlan te din-hmun leh Central YLA in an lo chhawmdawl dan te tarlan niin, raltlan awm mek leh lo thlen belh turte chhawmdawl leh enkawl zui dan turte pawh sawiho a ni bawk. Tun dinhmunah Lawngtlai District chhungah Myanmar atanga raltlan lo lut mi 4,826 an awm mek a, an zinga mi 3,241 chu kum 12 chunglam niin, kum 12 hnuailam mi 1,585 an awm a; hmeichhia 2,254 leh mipa 2,572 an ni. Raltlante chhawmdawl leh enkawlna atan hian an khawsakna tur hmun ngaihtuah belh chungchang te, an ei leh in tur leh damdawi chung-chang te leh an mamawh tur hrang hrang phuhruk dan turte pawh he hunah hian sawiho a ni.

PC Party in midang be mek

PC Party chuan kumin atana Aizawl-a an party Office hawnna hun nimin khan hmangin he hunah hian an Vice President Lalrinzuala Chawngthu chuan kum 2023 inthlanpui kan hmachhawn turah PC Party Policy tihhlawhtlin duhtu apiang te thawhpuiin, sawrkara an tel ngei tur thu an President in a lo sawi tawh angin, tunah hian inthlanpui thlirin Party dang nen inbiak chhoh mek a nih thu a sawi.

Hna la chhunzawm rihlo

Mamit District panna kawng, National Highway 44A hna kallai zawhfelna tura Ministry of Road Transport and Highway in cheng vbc.1109.88 sanction order a tihchhuah hnuah leh kumin December thla thlenga hnathawh hun tur pawhsei a nih hnuah hna erawh chhunzawm ala ni lo a, PWD hotute chuan huntiam ralhmaa zawhfel ngei an tum thu an sawi thung.

Fisheries Action Plan pawm

Champhai District Fisheries Action Plan for Financial Year 2022-2023 chu nimin khan sawihona neia pawm a ni. Financial Year 2022-2023 chhunga Centrally Sponsored Scheme, Pradhan Mantri Matsya Sampada Yojana (PMMSY) kaltlanga Champhai District chhunga Sangha khawi tihhmasawnna tura ruahmanna duan lawk, Champhai District Fisheries Action Plan hi nimin khan District Bawrhsap Maria CT. Zuali hovin zirhona neia pawm a ni a. Champhai District Fisheries Action Plan 2022-2023 hnuaia hmalakna tura ruahman atanga senso ngai zat, Total Project cost hi cheng nuai 262.49 a ni a, Cluster Based Location anga kalpui tum niin Dil thar (New Pond) Hectare 10 a zau siam nan cheng nuai 124 ruahman a ni a, Sangha note khawina (Nursery/Rearing Pond) Hectare 10 a zau siam nan cheng nuai 110 ruahman chhin a nih bakah Sangha leh buh emaw, ran emaw enkawl kawpna (Integrated Fish Farming) kalpui nan ram Hectare 25 a zauah cheng nuai 25 ruahman a ni bawk.