Chanchin lawrkhawm

Mizoram-ah Omicron la hmu lo

    COVID-19 hri thar Omicron vei Mizoram-ah hmuh a la ni lo. State Nodal Office Dr. Pachuau Lalmalsawma hnen atanga thudawn danin tun thlengin Mizoram-ah Covid-19 hri chhuak thar, Omicron vei an la hmu lo a. He hri vei nia rin-hlelh sample-te chu tunkar chho hian enfiah turin Kolkata lamah thawn an tum tih a sawi bawk. Covid-19 hi nikum kumtawp lam atangin hmuh-chhuah hi a tlahniam deuh a; mahse, kumin-ah hri kai hmuhchhuah hi a sang chak hle a ni. Kumin kum bul atanga hri kai pun chhoh chhan hi thingtlang lama haw khawm a Krismas leh kumthar lawmna a a huhova zai, lam leh ruaitheh a tam vang niin Health Department hotute chuan an ngai a. Hetianga an khua a hunpui laia haw khawmna a hri kaite hian khawpui lamah an pu darh leh ang tih an hlauh thu an sawi bawk.

DC hovin kawng enfiah

Lunglei District chhunga NH. 54 laihzauh leh siamthat hna thawh meka hnathawh chu Inrinni khan Lunglei District Bawrhsap Kulothungan A hovin sawrkar mi pawimawh te leh hnathawktu Company aiawh ten an enfiah a, Lunglei DC chuan kawng siam mekah complaint lo lut te rang thei ang bera bawhzui zel anih tur thu sawiin, ROW (right of way) chhunga land filling tih nasat ngaihna hmunah te pawh, leivung chuan a thlang lui/kawr te a tihchhiat lohna atan land filling tih hmaa Toe-wall siam vek tawh turin Contractor chu a hrilh a. Ram hmasawnna atana thawk vek an nih avangin kawng tha kan neih vat theihna turin theihtawpa mipui leh a thawktute kan tanrual a ngaih thu a sawi bawk.

Deputy Speaker in hmanpui

Tuipuiral Zirlai Pawl (TZP) General Conference vawi 37-na chu tun thla ni 6-8 chhung khan Khankawn-ah neih niin he hun hi Assembly Deputy Speaker Er. Lalrinawma chuan a hmanpui a, Zirlaite chu mahni zirlai tha taka zira hlawhtlin tum ngei tura a chah bakah mahni hnam ziarang leh hnam thuamte zahpui lova chhawmnung zel turin a chah bawk.

ZPM in sawrkar an phut

ZPM Thalaite chuan Inrinni khan thuchhuah siamin Aitlâng hmuna Hmunphiah hmun neitu Mizote chu Assam Police-ten neksawrin, Hmunphiah hmun neitute an mangang hle nia an sawi bakah Mizote hmunphiah hmun tam tak chu Assam Police-ten an luahsak niin an sawi a. Saihapui ‘V’ ah pawh Mizo kuhva huan neite kuhva thar Assam Police-te hian lawh an phalsak lo nia sawiin, an thlavang hauh kawnga chak taka hma la turin sawrkar an phut bawk.

Exam turte MBSE in ngen

Mizoram Board of School Education (MBSE) chuan kumin February leh March thla a HSLC leh HSSLC Examination 2022 hmachhawn tur, a bik takin kum 15 leh 18 inkar te chu he kum bithliah te tana sawrkarin a pek mek COVID-19 Vaccine lak chu ngai pawimawh theuh turin leh a rang lama la ngei turin zirlai naupang te an ngenin an beisei tih Inrinni khan thuchhuah siamin a tarlang.