Hri leng hluar thar leh mek kara Serchhip District mipui inkaihhruaina tur tihchhuah a ni

COVID-19 hri leng avanga Mizoram puma mipui inkaihhruaina tihkhauh leh a nih hnuah Serchhip District-a mipui kaihhruaina tur pawh tihchhuah a ni ve leh ta.

Tun thla ni 31 zanlai thlenga Serchhip District mipuite kaihhruaina tur tihchhuah thar hi Mizoram puma inkaihhruaina hman tur nen a danglam lutuk lova, zirna In hawn chungchangah Board Exam tur (Class-X leh XII) tan CAB tha taka zawm chungin School leh Hostel hawn phal niin Class I atanga class IX leh Class XI zirlaite tan Sikul leh Hostel kharin, Online-in Cass lâk chhunzawm a ni anga, Training Institute erawh chu a hmuna leng zat chanve (50% seating capacity) luah khatin hawn phal a ni. Sakhaw Biak In leh Inkhawm chungchangah CAB khauh taka zawm chungin chhunah chauh Biak In-a leng zat chanve (50% seating capacity) aia tam lovin Kohhran Inkhawm pangngai neih phal a ni a, zing leh tlai tawngtai inkhawm pawh phal niin Kohhran Inkhawmpui pawh Biak In-a leng chanve telin chhun lamah neih phal a ni a, ruai buatsaih phal a ni lo thung.

Inneih Inkhawm leh Mitthi Vuina neih theih niin a hmuna leng zat chanve, emaw mi 50 aia tam lo (a tlêm zawk zawk) tel tur niin ei leh in sem phal a ni lova, Picnic spot, Public park leh Swimming Pool te hawn phal a ni lova, Sports practice leh Tournament te entu awm lova phal niin pungkhawm thei bituk erawh siam a ni a, Gym leh Beauty Parlour te hawn phalloh a nih laiin lumehna dawr rawh kaihhruaina siamin hawn phal a ni. Heng bak mipui punkhawmna Birthday leh thildang lawm te chu khap ni mah se sawrkar phalna la-a National/State Level Programme pawimawhte chu huaihawt phalsak a ni thei anga. A huhova pawn chhuah (lui kal, trekking, hiking, adventure sports, adt.) te chu khap leh a ni bawk.

Sawrkar thuchhuah in a tarlan danin Construction works (mimal, leh sawrkar hnathawh) leh MGNREGA bakah MP leh MLA Fund hmanga hnathawh te chu CAB uluk taka zawm chungin phal a ni a, heng baka hnathawh hrang hrangte pawh phal niin Bungraw load leh unload hna chu phal a nih rualin zan lamah Curfew chhunga thawh ngai a awm a nih chuan VLTF te hriatpuina a kalpui theih niin zing dar 2:00 hmaa zawh vek tur a ni thung a. Mizoram Sawrkar Office-ah Office hnathawktu zawng zawng kal tur a nih rualin phalna/dilna la lawk lovin Office tlawh/dawr phal a ni lo thung.

Hetihlai hian Serchhip khawpui chhunga Bazar leh dawr inhawn dan tur chungchang chu Vawiin chawhma dar 10:30 hian Bawrhsap hovin sawiihona neih leh dawn a, he hunah hian sawrkar lam bakah sumdawng pawl te pawh tel tura sawm an ni bawk a ni.

Comments

Chhiar Hlawhte