Aizawl-a Congress Bhavan hawnna hun hman a ni

Congress Party chuan Aizawl-a an Office, Congress Bhavan hawnna hun nimin khan an hmang.

Kumin atana Congress Bhavan hawnna ah hian MPCC President Lalsawta chuan tuna kan ram dinhmun chu Mizoram mipui hian tha lo an tih thu leh amah ngei pawhin thalo a tih thu a sawi a, “Mizoram hi Mexico-te, Columbia-te anga misualte rorelna ah kan siam ang tih hi ka hlau a ni. Kan ram hun tawng mekah hian mipui chuan tan tur lam kan hre vek tawh a, mahse, kan sawrkar hi a ni lo lamah a tang niin mipuiin kan hre tlat. Kan ram tichhetu hi huai taka kan do a ngai a. Mizoram dinhmun chhe mek siamtha tur leh, sawrkar tha siam turin kan sawrkar leh hi a tul tlat a ni,” a ti.

Lalsawta chuan, “He MNF sawrkar hi a sawrkar chhunzawm zel chuan kan duh loh ramah min hnuk lut dawn. Hei hi Mizoram mipui hian kan dan a ngai a ni,” tiin “Tuna Mizoram tibuaitu ber chu zep rual lohin pawisa a ni. Pawisa duh lutukna avangin kan ram a buai mek a, sawrkar a buai mek a, hei hi siamthat kan tum a ni,” a ti a, “Mi hausate hi kan hua a ni lo, hausakna hmanga vote lei tumte hi kan duh lo a ni,” a ti bawk.