Tun thla ni 15 thleng atan inkaihhruaina siam

Mizoram sawrkar chuan tun thla ni 15 thlenga hman turin COVID-19 chungchang avanga inkaihhruaina tur a tichhuak leh ta.

Hemi chungchanga State Executive Committee Chairman leh Chief Secretary Renu Sharma-i’n nimin a thuchhuah a siam ah Mizoram chhunga COVID-19 darh dan leh mipui zinga hri kai thar awm dan thlirin inkaihhruaina kalpui mek leh hri kaite enkawl kawnga hma lakna chhunzawm zel chuMizoram State Disaster Management Authority chuan tul a la ti tih a tarlang a, a bik takin tunhnaia Covid variant thar ‘Omicron’ WHO-in a puan thar tak chu uluk taka lo inven a tul tih a tarlang bawk.

Nimin-a sawrkar in thuchhuah a siam ah hian tun thla, December 15, 2021 zanlai dar 12:00 thlenga inkaihhruaina tur tarlan nghal a ni a, inkaihhruaina hmanlai nen tih danglam lutuk a awm lova, AMC Area pawnlam ah chuan Deputy Commissioner (DC) ten an District chhunga COVID-19 hri len dan dinhmun azirin inkaihhruaina an siam tur thu tarlan ni bawkin Mizoram-ah Kristiante hunpui – Krismas 2021 leh Kumthar, 2022 kan hmanna ah COVID-19 hripui a darh loh nan theihtawpa tan lâk lehzual a ngai tih tarlan a ni bawk.