Mizoram State Boxing Championship Serchhip-ah khelh tan a ni ta

Mizoram State Boxing Championship vawi 42-na chu nimin khan Serchhip Boxing Hall-ah khelh tan a ni a, Law & Judicial Minister TJ. Lalnuntluanga chuan he intihsiakna hi a hawng a ni.

Mizoram hmun hrang hrang atanga Boxer 145 te inelna tur Mizoram State Boxing Championship hawnna hunah hian Minister TJ. Lalnuntluanga chuan Zofate hian Pathian zarah hma kan sawn nasa tawh hle tih sawiin, chutihrual chuan mi tam tak thinlungah hnamdang te tluk tawk lova inhriatna, en sanna te, inngaihhniamna leh tul lova hnamdang te zaha mahni hnam zahpuina thinlung nei kan la tam nia a hriat thu a sawi a. Boxer te chu Sportsman thinlung pu chunga khawvel hnamdang te laka chhungnunna thinlung pu turin leh Zoram mipui te tana hma hruaitu ni tura chahin a fuih bawk. TJ. Lalnuntluanga chuan Boxing chu mahni rih zawng tlukpui inbeihna a nih avangin hnamdangte chung en bik lovin theihna chungnung tak an nei tih inhre reng turin Boxer te chu a chah a, Mizoram in Boxing-ah hma a sawn zel theih nan hruaitu inpe tak tak a nei thin chu lawmawm a tih thu pawh sawiin, Boxing tuimite tana intihsiakna fel fai tak an buatsaih leh thei chu lawmawm a tih thu a sawi bawk.

He hunah hian Khual Zahawm Youth Affairs and Tourism Board Vice Chairman TC. Pachhunga pawhin vawi tam tak Mizoram hming titha tawhtu Boxing Association te hmalakna te sawrkarin theihtawp a chhuahpui zel dawn tih a sawi a. Sports hmasawnna ah Mizoram kan that avangin sawrkar laipuiin Centre of Excellence panga (5) a thlan pawhin Mizoram chu kan tel thu leh hetah hian Boxing chu Discipline pakhat a ni nghe nghe tih a sawi a. Boxing chu mahni rihzawng tlukpui inelna a nih avangin khawvela hmingthan theihna remchang kan neihna infiamna a ni a, hma a sawn zel theih nan kan bei zel dawn a ni, a ti bawk.

Serchhip District Boxing Association President Kapliana Pachuau kaihhruai he hunah hian Organising Committee Chairman leh Serchhip District Bawrhsap Kumar Abhishek chuan Mizoram State Boxing Championship, 2021 a hlawhtlin theih nana thawktute zawng zawng chungah lawmthu sawiin, Boxing-ah Mizoram in theihna sang tak a nei tih hre reng chunga thalaite an inbuatsaih deuh deuh a tul hle nia a hriat thu a tarlang bawk.

Tunkar Zirtawpni thlenga neih tur 42nd Mizoram State Boxing Championship-ah hian District 9 atangin Boxer 145 an tel a, Category 42-ah inelna neih tur niin inhnek (bout) 160 awm tura duan a ni a. Team Champion leh Best Boxer te thlan an ni bawk ang.

Comments

Popular News (Last 30 Days)

LPG man bithliah thar