Dan lova Borapansury leh a chhehvela Foreigner rawn luh tum te dodalna kawngah thawhho rel

Mizo Zirlai Pawl (MZP) leh Chakma Autonomous District Council (CADC) area-a pawl hrang hrangte nimin-a Borapansuri-a thukhawm chuan Dan lova Borapansury leh a chhehvela Foreigner rawn luh tum te a tul anga dodalna kawngah thawhho nise an ti.

MZP hian nimin chawhnu khan Borapansuri khuaa Zofate Chawlhbuk-ah MZP chuan CADC area-a Chakma hruaitute kokhawmin Meeting an neihpui a, he hunah hian MZP General Hqrs. President Lalnunmawia Pautu chuan CADC Area a mihring an pun chak zia leh dan lova a ruka pemlut an tam zia MZP chuan a hria tih sawiin, heng dan lova Bangladesh atanga lo pemlut Chakma te chu do a, chutiang an awm a nih chuan thawhpui lo tur tur leh arang thei ang bera MZP hnena hriattir vat thin turin he huna tel CADC area-a VC, MCSU, CMS leh Young Chakma Association (YCA) hruaitute a hrilh a. MZP President chuan, “Chakma hrim hrim hi kan haw lova, kan huat ber chu dan lova lo pem lut, kum 1950 hnu lama duh duh a rawn pem luta, diklo taka ram leilung fate chanai rawn chuhpuitute hi kan huat ber chu an ni. Chuvang chuan nangni dan anga awm, 1950 hmalama Mizorama awm tawh te hian MZP min thawhpuia, dan lova lo pem lutte leh rawn luh tum mekte dang turin, thawhho puiah ka sawm che u a ni,” tiin vhuti ni lova Mizo chunga buaina an siam chuan MZP laka buaina siam an nih tur thu a sawi bawk.

He hunah hian YCA Borapansury Zone President Santosh Chakma chuan heng dan lova lo pem lut Bangladeshi rilru pu te hi an mamawh lo tih sawiin, “Foreigner hi kan duh lo a ni, kan tan buaina an ni a, keini chuan kan thlawp tlat che u a ni,” a ti a. VCP Dal Kumar Chakma BPS-I East pawhin MZP ten an tlawh chu an lawm hle tih sawiin, “Bangladesh atanga rawn lutte chungchangah chuan keimahni tan zawk pawh hian buaina lian tak an thlen thei a, chuvang chuan keini pawhin theihtawpin kan do ang,” a ti a. Zonal YCA Secretary Daniel Chakma pawhin CADC chhunga YCA leh NGO hrang hrangte chuan dan lova rawn lutte hi tumah an pawm lo tih sawiin, “Kan tan buaina an rawn thlen a, keini chuan in hmalak mekna hi a tawp thlengin kan thlawp tlat dawn a ni,” a ti bawk.

He thutkhawm a tel te hian “Dan lova Borapansury leh a chhehvel a Foreigner rawn luh tum te chu MZP leh YCA Zonal, Br. YCA, MCSU, CMS, leh VC te chuan a tul anga dodalna kawngah thawhho nise tha kan ti,” tiin Resolution an pass a ni.