Serchhip-a Paragliding Pilot Training kharna District Bawrhsap hovin hman a ni

Mizoram Aero-Sport Association (MASA) hnuaia Paragliding Pilot Training hmawr bawkna, Paragliding Pilot Proficiency (P3) Training Serchhip-a neih chu nimin khan zawhfel niin he training kharna leh Certificate semna chu District Bawrhsap Kumar Abhishek IAS hovin neih a ni.

Serchhip Bawngchawm tlang Paragliding Take-Off Point-a training kharna hun tawi nimin a neih ah hian District Bawrhsap Kumar Abhishek chuan hlawhtling taka Paragliding Pilot Training zawhfel a ni ta chu lawmawm a tih thu a sawi a, Training chhuak ta Pilot 15 te chu a lawmpui thu leh hmalam pan zela Professional ni thei tur leh Pragliding intihsiakna a tel thei tur khawpa tan la chhunzawm zel turin a ngen a. Mizoram mai nilo India ram ti hmingthatu ni thei tura tan la chhunzawm zel tura fuihin, chutiang tur chuan Serchhip-ah hmunhma tha tak a awm thu leh, heng hmunhma te zawngchhuak a buatsaihtu MASA hruaitute chungah lawmthu a sawi bawk. Bawrhsap chuan Pilot Training chhuak te chu Tourism tih hmasawn kawngah a fawng vuantu pawimawh tak zingah an tel tih inhre turin a chah a. Paragliding Take-Off Point hmunhma te ti hmasawn a, changtlung zawk a cheithat anih zel theih nan a theih chin chin ah ke alo pen ve dawn tih a sawi bawk.

Mizoram Aero-Sport Association (MASA) hnuaia Paragliding Training hi kumin February ni 9 atang khan hmun hniam zawk, North Vanlaiphai Leilet Zawl-ah bul tanin Pilot Proficiency (P1 leh P2 ) neih lo ni tawh a, Champhai Leilet zawl-ah Refresher Course nei lehin Bawngchawm tlang-ah hian hmun sang zawka thlawk thei turin P3 Training hi neih leh a ni a, he training-ah hian Serchhip, Aizawl leh Lunglei atangin mipa 13 leh hmeichhia 2 telin December ni 6, 2021 khan Flight Exam neih a ni.

Nimin-a training chhuak te hmaah hian Mizo Paragliding Pilot Training chhuak mi 14 an lo awm tawh a, an zinga 11 11 te chu Civil mi an ni a, nimin-a Training chhuak ta hmeichhia pahnih te hi Mizo hmeichhe zinga P3 Training chhuak thei hmasa ber an ni a, midang phur thei tur khawp erawh chuan boruak-ah darkar 200 tal thlawh a tul thung a ni.