Chanchin thar thenkhat :

Mizoram MP in Parliament-ah ASF sawichhuak

Nimin-a Rajya Sabha thutkhawm ah Mizoram MP K. Vanlalvena chuan African Swine Fever (ASF) vanga Mizoram tawrhna chungchang a sawilang. Parliament Thlasik thutkhawm neih mekah Mizoram Rajya Sabha MP K. Vanlalvena hian nimin khan thu sawina hun changin African Swine Fever (ASF) vanga Mizoram tawrhna hi sawiin, AH&Vety Department, Govt. of Mizoram report dan tarlangin Mizoram-a District 11-a khaw 271-ah ASF avangin vawk 29,800 an thih tawh thu a sawi a. Hri kai rinhlelh Vawk 10380 tihhlum a nih tawh bakah, heng Vawk thi zawng zawngte hlut zawng hi cheng vbc. 8000 vel ni a chhut chhuah a nih thu Parliament House a hriattir bawk a ni. K. Vanlalvena chuan tun ang hunah hetiang zat laia tam mihring ranvulh thihna hi kut hnathawktu mirethei te tan chuan Disaster leh Natural Calamity a nih thu sawiin, he African Swine Fever tuartu te zawng zawng hnenah zangnadawmna pe turin Central sawrkar a ngen nghal bawk a ni.

Lok Sabha MP in Parliament-ah Covid sawilang

Mizoram Lok Sabha MP C. Lalrosanga chuan Mizoram-a COVID-19 hripui dona kawnga theihtawp chhuahpui turin sawrkar laipui hotute a sawm. Nizan hmasa zan rei tak thleng khan Lok Sabha-ah COVID-19 chungchang sawihona neih niin he hunah hian Mizoram Lok Sabha MP hi telin Mzoram-a he hripui vei kiam chak thei lo leh State dangte, a bikin hmarchhak State dangte nena khaikhinin Covid kai zat a sang lam a la ni zel chu ralpui phiara phiarpui a, dopui turin Central sawrkar chu a ngen a ni. C. Lalrosanga chuan he hripui chi thar 'Omicron' laka inveng tur leh do tura India sawrkarin thapui a chhuah tul a tih thu a sawi bawk.

Mizoram Lok Sabha MP hian nimin khan Union Home Secretary hmuin Mizoram mamawh thenkhat a sawipui leh a. Heng zingah hian Aizawl atanga Assam Rifles sawnchhuah leh COVID-19 do dan chung-chang te leh thu pawimawh dangte a tel a ni.

Cashless Area-ah Aibawk khua puan a ni

Mizoram Rural Bank (MRB), Aibawk Branch hmalakna in Aibawk khua chu ‘Cashless Area’ ah puan a ni. Sawrkar laipui hmalakna lian tak tihhlawhtlinna tur atana Digital India-in a buaipui mek Cashless Transaction chungchangah MRB Aibawk Branch chuan Aibawk khaw chhung chu Cashless Area ni turin theihtawpa an buaipui hnuah niminpiah khan Cashless Area-ah hian puan a ni a. Cashless area-a puan a nih hnu hian Aibawk khawchhunga bazar duhte, chaw ei turte, inentir turte, sawrkar a pawisa pek tur neite tan leh dawr a thil lei tur reng reng tan pawisa kher pe lovin Online Payment hmanga pawisa inpek chu a theih tawh mai dawn avangin mipui te tan awlsamna nasa tak a thlen ngei beisei a ni.

Aizawl-ah Scholarshhip la dawnglote an pungkhawm

Mizoram-a zirlai te zinga Scholarship la dawnglo te chu nimin khan Aizawl-a Chief Minister Bangla kawt-ah pungkhawmin Scholarship la tang zawng zawng te rang taka semchhuak turin an phut. He hunah hian Mizoram-a zirna In hrang hranga Scholarship la dawnglo te chu pungkhawmin zirlaite Scholarship dawn tur la tang te chu rang taka semchhuah sak vat an duh thu an sawi a, Scholarship chu tunhnaiah thenkhat in an lak tawh laiin pek kimloh ala awm chu an hriatthiam loh thu an sawi a, sawrkar chu nawr chawp chauha thil an tih thin avangin beiseina an nei tawhlo tih an sawi bawk. MSU chuan Mizoram Scholarship Board (MSB)-ah Scho la dawnglo mi 1404 te hming chu nimin khan an thehlut bawk.

Iron rod zawrh enfiah

Food, Civil Supplies & Consumer Affairs Department hnuaia din, Sub-Committee on Quality Control of Cement & Iron Rod thurel bawhzuiin niminpiah khan Aizawl-a Iron rod (TMT Bar) zawrhna dawr hrang hrang-a Iron rod zawrhte chu a size leh buk a tlin leh tlin loh enfiah a ni a. He hunah hian Iron rod zawrhna dawr 47 endik niin tehfung tling pha lo Iron rod zuar 41 hmuh-chhuah an ni a, heng dawr atangte hian rod bundle 6,756 man a ni a, hei hi quintal 3,700 vel niin, cheng vbc. 2.42 man vela chhut a ni. Inspection Team-te hmuh danin Mizorama Iron rod siam leh lakluh tam zawk hian BIS tehfung an tling pha lo hle a, tehfung tling tha Iron rod te chu Tata Tiscon, Kamdhenu leh Kay2 Xenox brand te an ni.

Observer in Mamit tlawh

Electoral Roll Special Summary Revision neih meka Mamit District tana Observer tura ruat Dr. Lalzirmawia Chhangte chuan nimin khan Mamit tlawhin DC Conference Hall-ah Electoral Roll buaipuitute nen inkawmna an nei a. India ram chu mipuite zalenna ram a nih angin, Dan hnuaia zalen taka kan duh ber kan vote theih chu Election Commission of India chuan a duh dan a nih thu sawiin, chumi tur chuan Roll felfai leh rintlak kan neih chu thil pawimawh tak a nih thu a sawi a. India khua leh tui dik tak te Roll-a lut tura awlsam taka dilna an thehluh theih chu Election Commission of India duhdan a nih avangin online hmang pawhin dilna thehluh theih a nih thu a sawi bawk.

CM in Union Minister kawm

New Delhi-a cham mek Chief Minister Zoramthanga chuan nimin khan Science and Technology Ministry changtu Dr. Jitendra Singh chu a chenna In-ah hmuin a Ministry hnuai atanga Mizoram tan COVID-19 sample test na, Mobile RT-PCR Van a pek avangin lawmthu a sawi a. Mizoram State-in All India Services Cadre hrang a mamawh zia a sawipui bawk. Chief Minister hian mi pawimawh dangte pawh a kawm bawk.

BJP hruaitu ten PM an hmu

BJP Mizoram Pradesh hruaitute chuan nimin chhun khan an President Vanlalhmuaka hovin New Delhi-ah Prime Minister Narendra Modi chu an hmu a, Mizote leh Mizoram-in harsatna a tawh hrang hrangte thlenin, Mizoram chu India hmarchhak State te zingah pawh hmasawnna kawnga hnufum ber an nih thu leh ngaihsak bik a tul thu te an hrilh a. Central sawrkar kaltlanga hnathawh mek, a bikin kawngpui siam mek te, Rel kawng siam mek te, Airport thawmthat mekte chu a hun taka thawh zawh a nih theihna atana tan lakpui tura ngenna leh thil pawimawh dang te an thlen bawk a ni. Prime Minister chuan heng an thil thlen te hi bawhzui a nih tur thu lo hrilhin Mizoram chu India rama State pawimawh tak pakhat a nih thu a lo hrilh bawk a ni.

CBI kohluh ngei nise ti

ZPM Thalaite chuan nimin khan Aizawl Vanapa Hall kawt-ah ‘Thudik hailan phutna Programme’ an hmang a, he hunah hian ZPM Thalai Sr. Vice President Dr. C. Lalrammawia chuan Skywalk leh Ropeway project hlamzuih chungchangah Congress leh MNF Party-te inkawhtawnna politics, thudik hailan tumna tak tak awm si lo hi mipuiin an ning tawh tih a sawi a, “Chu ai chuan thudikin thil ti diklotu hi kawk tawh zawk rawh se. Chumi a thlen theihna turin ZPM Thalai chuan Skywalk leh Ropeway siamnaa sum pekchhuah leh hnathawhah thil dik lo lian tak awm hi chhuichianga a tul anga hma la turin Central Bereau of Investigation (CBI) koh luh ngei ni se kan ti,” a ti bawk.