Khawbung-ah Mini Sports Complex hawn a ni

Rural Development Minister Lalruatkima chuan nimin khan cheng nuai 369.89 senga sak Khawbung Mini Sports Complex chu a hawng.

Ministry of DoNER hnuai Non-Lapsable Central Pool of Resources (NLCPR) kaltlanga RD Department Mizoram-in project lian a kalpui hmasak ber Khawbung Mini Sports Complex hawnna hunah hian RD Minister chuan hri leng avanga kum 2 dawn hun harsa tawn a nih hnua Khawbung Mini Sports Complex hawn theiha peihfel a ni thei chu lawmawm a tih thu sawiin, NLCPR kaltlangin Aibawk, East Lungdar leh Khaw-bung-ah te Mini Sports Complex sak hna kalpui a nih thu a sawi a. Mihringte hriselna leh theihna te hailang thei turin infiamna hmunhmate thawmtha chung zela hmalak thin a nih thu sawiin, pipu sulhnu tamna leh infiamna huanga mi hmingthate tamna East Tuipui bial-a infiamna hmunhma changtlung tak din a ni chu a lawmpui thu a sawi a. Sports Minister nen an inrawn hnuah External Aided Project (EAP) kaltlanga Khawbung Mini Sports Complex-ah Artificial Grass phah tura hmalak tum a nih thu leh TATA Trust Football Academy dah tum a nih thu a sawi bawk.

Khawbung Mini Sport Complex hi NLCPR hnuaiah kum 2017 January ni 4 atanga thawh tan niin July 14, 2020 khan zawhfel a ni a, Advance Consultancy, Republic Veng, Aizawl chu he hna thawktu atana thlan an ni. Khawbung Mini Sports Complex hian Works Component hrang hrang 12 a keng tel a. Heng zingah hian Football Pitch, a dung metre 105 leh avang metre 68; S/M Gallery kengtel Basketball Court, S/M Gallery kengtel Volleyball Court te a awm a. RCC Gallery 3 leh PCC Galery 1, RCC Pavilion cum Dressing Room, Mizo pa chhiara chhawng hnih a awm tel bawk a. Heng bakah hian Mini Sports Complex panna kawng 2 siam tel a ni bawk.