Niminpiah-ah hri kai 315 hmuh belh leh an ni

Mizoram-ah COVID-19 hri kai hmuhchhuah la awm belh zelin niminpiah khan Sample enfiah 3480 atangin hri kai mi 315 hmuhchhuah an ni a, Sample enfiah zawng zawng atanga za zela 9.05 te chuan hri an kai a ni.

Niminpiah khan ZMC-a RT-PCR Laboratory-ah Sample 373 enfiah niin heng atang hian hri kai mi 39 hmuh an ni a, Sihphir-ah hri kai mi 9 hmuh niin a bak hi Veng leh khua 17 ami te an ni. Fluorescent Immunoassay Test hmangin niminpiah khan Aizawl-ah Sample 19 enfiah niin hri kai mi pakhat hmuh a ni bawk a, Aizawl Bungkawn Veng a ni.

District 7-a TrueNat Laboratory-ah niminpiah khan Sample 160 enfiah ni bawkin hri kai mi 16 hmuh an ni a, an zinga 8 te chu Champhai District-a hri kai hmuhchhuah niin Hnahthial District-ah 3, Serchhip District-ah 2 leh Lunglei, Mamit leh Khawzawl District-ah pakhat theuh hmuh an ni bawk.

Mizoram-a hri kai hmuhchhuah zinga a tam ber erawh Rapid Antigen Test hmanga hmuhchhuah an la ni zel a, niminpiah khan Mizoram ah Rapid Antigen Test hmangin Sample 2928 enfiah niin hri kai mi 259 hmuhchhuah an ni a, Aizawl District-ah hri kai mi 151 hmuh niin an zinga 15 te chu Baktawng khua ami an ni a, Serchhip District-ah 30, Lunglei District-ah 19, Lawngtlai District-ah 11, Khawzawl leh Hnahthial District-ah mi 10 ve ve, Saitual District-ah mi 7, Champhai leh Kolasib District-ah 6 ve ve, Mamit District-ah 5 leh Siaha District-ah 4 te an ni.

Nimin khan tlai dar 5:00 thlengin Mizoram-a hri kai mi 411 te enkawl dam an ni leh bawk a, heti hian nimin tlai dar 5:00 thlenga Mizo-ram-a hri kai hmuhchhuah tawh chu 1,35,765 niin an zinga 1,31,956 te chu enkawl dam an ni tawh a, hri kai hmuhchhuah atanga za zela 97.19 te enkawl dam ni tawhin hri kai enkawllai 3305 an la awm bawk. Nizan hmasa khan hri kai zingah mi pahnih boralin nimin khan mi pakhat a boral leh bawk a, Mizoram-a hri kai zingah mi 504 an boral tawh a ni.

Comments

Popular News (Last 30 Days)

Serchhip DCSO sawn a ni