Mualpheng to Maite 11 kVA Electric line hawn a ni

SEDP sum cheng nuai 115 senga Mualpheng to Maite 11 kVA electric hrui zam thar chu nimin khan P&E Minister R. Lalzirliana chuan Maite khua ah a hawng.

Hemi puala inkhawm Maite Community Hall-a neih ah P&E Minister chuan Sawrkarin State dang atangin kawlphetha lei nan sum tam tak a seng a, chuvangin kawlphetha renchem hi kan inzirtir leh kan ngaihpawimawh a tul hle, a ti a. Ho te a lang, chhun-a tul lova eng chhit te, pindan awmlohna a eng chhit te leh mamawhna awm miah lova current hman te hi kan chin loh a tha a ni, a ti bawk. P&E Minister chuan Sawrkarin kawlphetha tha zawka mipuite a pekna kawngah tunhnaia line thar 132kV Melriat- Lunglei leh 132 kV line Serchhip - E. Lungdar commission te chuan power hlohna a tih tlem a beisei bakah tha zawka mipuiin current an dawn a beisei thu a sawi a. Bairabi- Mamit-West Phaileng- Marpara line thar pawh hawn thuai beisei ani tih a sawi.

Tun hma chuan Maite khua hian 33kV Sub-Station Chhingchhip atanga Hmuntha kaltlangin power an dawng thin a, he Line hawn thar tak hmang hian 132kV Sub-Station Saitual atanga Mualpheng kaltlangin power an dawng tawh dawn a, hei hian mipui ten Electric Bill an pek thlengin awlsamna a siam sak thei dawn a ni.