Mizoram-ah hri kai hmuhchhuah la tlahniam zel

Mizoram-ah ni khat-a COVID-19 hri kai hmuhchhuah tlahniam hret hret zelin hri kai enkawllai pawh an tlem tawh viau a, niminpiah khan Sample 4319 enfiah niin hri kai mi 365 hmuh niin Sample enfiah atanga za zela 8.45 te chuan hri an kai a ni.

Niminpiah khan ZMC-a RT-PCR Laboratory-ah Aizawl District atanga Sample lak 270 enfiah niin heng atang hian hri kai mi 36 hmuh an ni a, an zinga 11 te chu Darlawn khua niin a tam zawk chu Aizawl khawpui chhung ami an ni. Fluorescent Immunoassay hmangin Aizawl District-ah Sample 28 enfiah a ni bawk a, heng atang hian hri kai mi 5 hmuh ni bawkin an vai hian Aizawl khawpui chhung ami te an ni.

Siaha leh Lawngtlai tihloh District dang zawnga TrueNat Laboratory hrang hrangah niminpiah khan Sample 388 enfiah ni leh bawkin hri kai mi 29 hmuh an ni bawk a, an zinga 7 te chu Lunglei District ami te niin Champhai District-ah 5, Aizawl leh Hnahthial District-ah 4 ve ve, Saitual District-ah 3, Serchhip leh Khawzawl District-ah 2 ve ve leh Kolasib leh Mamit District-ah mi pakhat ve ve te an ni.

Niminpiah khan Rapid Antigen Test hmangin Mizoram-ah Sample 3633 enfiah ni leh bawkin heng atang hian hri kai mi 295 hmuh leh an ni bawk a, an zinga 147 te chu Aizawl District-a hri kai hmuh te niin Serchhip District-ah 35, Siaha District-ah 23, Champhai District-ah 17, Hnahthial District-ah 15, Mamit District-ah 14, Saitual District-ah 13, Kolasib District-ah 11, Lawngtlai District-ah 9, Lunglei District-ah 7 leh Khawzawl District-ah hri kai mi 4 hmuh an ni bawk.

Nimin khan Mizoram-ah COVID-19 hri kai mi 250 te enkawl dam an ni ve leh a, heti hian nimin tlai dar 5:00 thlenga Mizoram-a hri kai hmuhchhuah tawh chu 1,35,175 niin an zinga 1,31,177 te enkawl dam an ni tawh a, hri kai hmuh atanga zaa 97.04 te enkawl dam ni tawhin hri kai enkawllai 3498 an la awm a. Hri kai zingah nimin khan mi pathum boral awm belh lehin hri kai boral hi mi 500 an tling ta a ni.