Chanchin thar thenkhat :

/

Bialtu MLA in hnathawh en

Kolasib bialtu MLA leh Supply Minister K. Lalrinliana chuan nimin khan a bial chhunga MLA Fund hmanga hnathawh thenkhat endikin nakum-a KTP General Conference thlenna tura ruahman Diakkawn Field-a inbuatsaihna te a hmunah a enpui bawk a. Kolasib bialtu MLA chuan Kolasib District-a Kal tha lo leh natna dang vanga Dialysis tih ngaite tan Aizawl pan zel a ngaih thin thu sawiin, hei hian damlote tan veivahna leh inenkawlna kawng thlengin harsatna a thlen phah thin thu a sawi a. MLA-LADS hmanga District Hospital, Kolasib-a Dialysis Room sak mek chu peihfel a nih hunah chuan Kolasib District mipui ten tangkai taka an hman a beisei thu a sawi bawk.


MPSC Member thar lalut

Mizoram Public Service Commission (MP-SC) Member atana ruat thar Vanlaltlana chu nimin khan Raj Bhavan-ah Mizoram Governor Hari Babu Kambhampati chuan rinawmna thu tiam tirin a lalut. MPSC Member thar lakluhna hun hi Chief Secretary Renu Sharma chuan kaihruaiin MPSC Member atana Vanlaltlana ruat a nihna lehkha a chhiar chhuak a. Hemi zawhah hian Governor Hari Babu Kambhampati chuan Vanlaltlana, Chief Engineer (Rtd), P&E Department chu rinawmna thu tiam tirin MPSC Member thar atan a lalut a ni.


Krismas pualin thisen pe

Association for Voluntary Blood Donation (AVBD) leh Mizoram State AIDS Control Society (MSACS) te tangkawp buatsaihin nimin atang khan Mizoram-a Blood Bank hrang hrangah Krismas Pual Thisen Pek Rûnpui chu neih tan a ni a, kum 2018 atangin Aizawl-ah Kris-mas puala thisen pek hi huaihawt niin, kum 2020 atangin District danga Blood Bank-ah te pawh huaihawt chhunzawm a ni. Krismas puala thisen pek rûnpui-ah hian kum 2018-ah thisen unit 568, kum 2019-ah unit 527 leh kum 2020-ah (blood bank hrang hrang) unit 1,942 pek a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »