Khawpui fai thlanna neih mekah Serchhip khawpui faina endik a ni

Mizoram sawrkar-a Urban Development & Poverty Alleviation Department hmalakna a Mizoram khawpui fai thlanna neih mekah nimin khan faina leh thianghlimna kawnga Serchhip khawpui hmalak dan enfiah a ni.

Mizoram sawrkar in Khawpui fai thlanna a buatsaih meka District khawpui fai endik tura ruat Panel of Expert te hian nimin khan Khawzawl atanga Serchhip rawn lutin Serchhip DC Meeting Hall-ah Addl. DC Lalmuansanga Ralte hovin lo dawnsawn an ni a. Addl. DC chuan Faina kawngah Serchhip District in kawng hrang hrangah hma a lak thu sawiin, khawpui fai endiktute chu a lo lawm a ni. He hunah hian Serchhip District Urban Development Officer (DUDO) Lalzikpuii chuan Faina kawnga Serchhip khawpui-a hmalak dan a lem nen entira sawifiahin, Serchhip Town chhunga VC 14 awmin Community/Public Toilet 17 a awm thu te, Serchhip District chu ODF+ a inpuang tawh a nih thu te, Sanitation Workers ten zing leh tlai-ah khawpui chhung an phiahfai thin thu leh Veng hrang hrang leh VC ten Faina kawnga inelna neih a nih hma pawh hian Faina kawnga hma la in hnatlang te an neih deuh reng thu a sawi a, Faina kawnga inelna ah vawi thum tak hnatlang neih tura tih chu tih hlawhtlin a nih thu a sawi bawk.

Hei bakah hian DUDO chuan kumin a AKAM hnuaia hmalakna leh Faina Hapta hman a nih dan te tarlangin, bawlhhlawh atanga leitha siam tura inzirtirna kalpui a nih dan te a sawi a, hemi kawngah hian kumin November 1 atangin bawlhhlawh tawih theih leh tawih theilo pawh thliar hrangin a paih turte tana a hranga chhinchhiahna siam a nih dan te a sawi a. Khawpui chhung cheimawina atan lungrem leh Footpath te rawng hnawih thar a nih thu te pawh sawiin, Veng thenkhat ah chuan bawlhhlawh bawm awmlohna tura hmalakna an kalpui thu te a sawi a. Hei bakah hian Plastic bawlhhlawh senghawina atana hmalak a nih thu sawiin, tunah hian Plastic Shedder chu District Bawrhsap hmalakna a neih a nih tawh thu a sawi a. Bawlhhlawh sawng-bawlna atan ram buaipui mek a nih thu pawh DUDO chuan sawiin, a hma lama ram lo ruahman tawh chu PHE Department tui lakna hnar lama awm a nih avanga sawiselna a awm avangin hmun dang ngaihtuah a nih thu leh tunah hian tihfel thawkhat a nih tawh thu a sawi bawk.

Faina kawnga Serchhip khawpui hmalak dan inhrilhhriatna neih a nih hnu hian Panel of Expert te hian Serchhip khawpui chhung fang nghalin IOC Veng-a kawtthler chei dan te, P&E Veng-ah Vantlang hmuna bawlhhlawh bawm awmlohna tura hmalakna te, Serchhip Hmar Veng a bawlhhlawh hmanga kawtthler cheina tura hmalakna te, Serchhip Vengchung-a tuihawk luankawr an enkawl dan leh Chanmari Veng-a Vantlang Zun In enkawl dan te en a ni a, hei bakah hian Dinthar Veng leh Darnam Veng te pawh en a ni bawk. Khawpui Fai endiktute hian Vawiin hian Serchhip chhuahsanin Hnahthial District an pan leh dawn a ni.