Serchhip District-ah mi 17 te ex-gratia pek an ni tawh

Serchhip District-ah COVID-19 vanga thi mi 17 chhungte hnenah ex-gratia pek an ni tawh.

Serchhip DC Office atanga thu kan dawn danin sawrkar in COVID-19 avanga thi chhungte hnenah ex-gratia pe tura ruahmanna a siam angin Serchhip District-ah hri kai avanga thi chhungte chuan ex-gratia dilna hi thehlutin heng dilna te hi a theih anga buaipuiin tihfel nghal zel a ni a. Nimin thleng khan Serchhip DC Office hian ex-gratia dilna 20 dawng tawhin heng atang hian mi 17 te dilna chu buaipui fel tawhin an dil angin Rs. 50,000/- theuh pek an ni tawh a, sum pekchhuah tawh zawng zawng hi Rs. 8,50,000/- ni tawhin dilna pakhat chu hnawl a ni thung a, tunah hian dilna pahnih te chu document thiltel ngai a kim loh avangin la tihfel a ni lo thung.

Serchhip District-ah hian October thla khan mi 6 leh November thla ah mi 6 bawk te hnenah ex-gratia hi pek an ni a, tun thla kal mekah hian mi 5 hnenah pek a ni tawh bawk.

Serchhip District-ah hian nimin thleng khan hri kai avanga boral mi 15 chhinchhiah ni tawhin hemi aia ex-gratia pek an tam chhan hi Serchhip District mi leh sa, District dang-a hri kai hmuhchhuah leh District dang Case a tarlan te zinga boral ten Serchhip DC Office-a dilna an thehluh vang a ni.