Health Minister hovin World AIDS Day Rally nei

Nimin December 1, 2021 khan khawvel pumah ‘World AIDS Day’ hman a ni a, Aizawl-ah chuan Mizoram State AIDS Control Society (MSACS) bultumin nimin zing khan ‘World AIDS Day Rally’ neih niin Health Minister Dr. R. Lalthangliana chuan a hmanpui a ni.

He Rally-ah hian Vanapa Hall atanga Millennium Centre thleng kawngzawh niin Millennium Centre tualzawl-a inkhawm inkhawm buatsaih ah Health Minister chuan Mizoram a AIDS vanga nunna chan tawh zawng zawngte sunna thu leh an chhungte an tawrhpui takzet tih a sawi a. Mizoram-a he natna kai tharte hi a tlangpuiin kum 19 – 49 inkar an nih ber thu tarlangin, a kai awm renga kan ngaih thin (high risk group) ruihhlo bawiha tangte, mipat hmeichhiat kawnga buan chaklote chang ni lovin mipui nawlpuiah a thleng tawh a, hei vang hian mi zawng zawngin tan kan lak tlan a ngai a ni, a ti a. AIDS veite thinhrik mai lova, anmahni ngaihsakna nen AIDS vei thar awm tawh lohna ram ni turin kan tanrual a ngai hle a ni, a ti bawk.

Health & Family Welfare Department Secretary R. Lalramnghaka pawhin he hunah hian thu sawiin COVID-19 hripui nasa taka kan do mek lai hian HIV/AIDS kan dona hi kan tithuanawp thiang lo tih sawiin, kan dinhmun hi kan inhriatchian poh leh thla a muang lova, HIV/AIDS phei hi chu kan taksa ah a hrik a luh tawh chuan tihdam theihloh a nih vang hian a inven lam kan ngaih pawimawh lehzual a ngai a ni, a ti a. ‘Love Brigade/Painting the Town Red Campaign’ kaltlanga Taxi driver-te hnena condom paina Seat Cover leh Jacket sem chu mipat hmeichhiatna hman kawnga inthlah zalenna tur thil a ni lo tih sawiin, Taxi driver te chu a theih ang anga an passenger te counselling pe thin turin a chah bawk.

Nimin-a World AIDS Day hmanna inkhawmah hian AIDS Health-care Foundation (AHF) hmalakna kaltlangin Aizawl khawpuia Taxi Driver leh Two-Wheeler Taxi Driver ten AIDS dona kawnga an hman tangkai tur hmanrua (Two-Wheeler Taxi Driver te tan Jacket leh Four-Wheeler Taxi Driverte tan Seat Cover) sem a ni bawk. MSACS in an chhinchhiah danin Mizoram-ah AIDS vei mi 25,080 awm tawhin nunna chan mi 3294 an awm tawh a, AIDS vei mek mi 21,786 awm anga chhin-chhiah a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar