Aizawl Civil Hospital Emergency Ward cheithat Health Minister in a hawng

Health Minister Dr. R. Lalthangliana chuan nimin khan Aizawl Civil Hospital Emergency (Casualty) Ward tihchangtlun leh cheithat chu a hawng.

Hemi puala inkhawm neih ah Health Minister Dr. R. Lalthangliana chuan Aizawl Civil Hospital chuan kawng hrang hrangin hma a sawn tih sawiin, Casualty chei thar, changtlung, fai leh hmuhnuam tak leh Baptist Church of Mizoram Zotlang Bial te hmalaknain vantlang inthiarna thianghlim tak siam thar a ni chu lawmawm a tih thu a sawi a. Trauma Center building thar hlak sak tan mek a nih thu sawiin, a puitlin hunah chuan he building-ah hian Department dang tawt taka awm mek te pawhin an chhawr tangkai thei dawn a, a nghahhlelhawm tawh hle a ni, a ti a. Kal leh Zunkawng thalo te enkawlna tur Super Specialist Doctor-in a thutchilh Nephrology Department hawn a ni tawh a, ICU pawh kum tam tak Khum 5 chauh kan neih hnuah tunhnaiah Khum 10 dah belh a ni a, MRI pawh dah thuai tura hmalak mek a ni, a ti. Health Minister chuan mihring dam chhung reilote a pawimawh ber midangte tana rawngbawl hna thawktu Doctor, Nurse leh Medical mi te chu indaih lo, buai leh hah taka an thawh mek laiin an tawngkam tha ringawt pawh damlote tan damna a tling tih hre thar leh turin a fuih bawk a ni.

He hunah hian khual zahawm Health & Family Welfare Board Vice Chairman Dr. ZR. Thiamsanga pawhin Mizoram thingtlang kilkhawr zawkah te damlo ten enkawlna tha zawk an dawn theih nan Rural Health Service tihchangtlun zel tul a tih thu a sawi a. Doctor, Nurse leh Health Worker indaihlohna a nasa em em a, chuti chunga mipui tana hah taka thawktu Medical mite fakawm a tih thu a sawi bawk.

Aizawl Civil Hospital Emergency Ward cheithat nan hian Rs. 45,92,274 sen a ni a. Civil Hospital Casualty a la awm ngai lo Heart Rate, Blood Pressure, ECG, SPO2 en theihna Patient Monitor thar pasarih (7) dah thar a ni a. Khum thar engemawzat dah belh niin a chhung pawh chei thar a ni a. Casualty bul, Hospital Gate chhungah Public Toilet thar tha tak, Baptist Church of Mizoram (BCM), Zotlang Pastor Bial, Aizawl te sum thawh cheng nuai 4.2 hmanga sak a ni bawk.