Chief Minister in Prime Minister kawmin Mizoram mamawh hrang hrang a thlen

Chief Minister Zoramthanga chuan nimin khan India Prime Minister Narendra Modi chu Parliament Building-a a Office-ah hmuin Mizoram mamawh hrang hrang a thlen a, Prime Minister chuan heng a thu thlen te hi ngai pawimawhin a tul anga bawhzui a nih tur thu a sawi a ni.

Nimin-a Prime Minister a kawmna ah hian Mizoram Chief Minister Zoramthanga chuan kum engemawzat liamta atanga Prime Minister leh Union Home Minister hrang hrang ten an lo tiam tawh angin Mizoram State-in All India Services (AIS) Cadre hrang a neih ve theihna tura chak taka hma lakpui turin Prime Minister Narendra Modi a ngen a. Separate Cadre Mizoram in a neih ve theihna tura a khawihtu ber Union Secretary hnenah lehkha ziaka, tihhlawhtlin thuai a nih ngei theih nan File pawh chak taka kal tir nghal tura hriattir turin Prime Minister a ngen a. Mizoram Sawrkarin Mizo tawng thiam ngei Chief Secretary a neih theih nana Sawrkar Laipui-a ngenna a lo thlen tawh chungchang pawh sawipuiin Prime Minister hian a lo bawhzui tur thu a sawi a ni.

Chief Minister chuan Mizoram Sawrkar hmalakna pawimawh tak Mau chungchang pawh Prime Minister hi hrilhin, Mau chinna hmun te leh a sawngbawlna hmun (industry) te chu a thlalak nen entirin chipchiar takin a sawipui a. Bamboo Link Road sial a tulzia a thlen chu Narendra Modi hian ngaih pawimawhin a hlawhtlin ngei theih nan Finance Minister hnenah sum leh pai sanction-na turin Head of account siam tura a hriattir tur thu Chief Minister hi a lo hrilh tih sawrkar thuchhuah chuan a tarlang a ni.

Prime Minister nen an inkawmna ah hian Myanmar ram buai avanga Mizoram-a tlanchhia refugee te chungchang pawh Chief Minister chuan sawiin, heng raltlan te tanpui turin Prime Minister hi a ngen a, hei bakah hian MNF returnees te tan Housing Assistance a dilpui bawk a. Prime Minister chuan a tul anga a lo enzui tur thu a hrilh a ni.

He hunah hian Hmarchhak State te bakah Mizoram ramri-a Bangladesh leh Myanmar-a politics boruak pawh Prime Minister Narendra Modi leh Mizoram Chief Minister te hian an sawidun a. Chief Minister Zoramthanga chuan Prime Minister nena inkawmna tha tak an hmang thei chu lawmawm a tih thu sawiin, Meeting an neih dun tawh zingah a hlawhtling ber pawl nia a hriat thu a sawi a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man