HIV/AIDS sawihona Health Minister in a hmanpui

Alliance India ten World AIDS Day 2021 puala HIV/AIDS dona kawnga sulsutu leh hmahruaitu te tawnhriat, hmalak dan leh hna thawh dan te sawihona hun nimin-a an buatsaih chu Health Minister Dr. R. Lalthangliana chuan a hmanpui.

HIV/AIDS dona kawnga NGO lian tak Mizoram State AIDS Control Society (MASCS) in an thawhpui – Alliance India ten Hotel Floria-a he hun an buatsaih ah hian Health Minister chuan HIV veite zirchianna ‘HIV Estimation 2019’ in India ram chu HIV/AIDS tlem tawhna ram ‘Low Pevalance Country’ tia chhinchhiah a ni mai bakah State tam zawka HIV positive an tlakhniam mek thu te a tarlan thu a sawi a. Chutih laiin state thenkhatah ram pumah HIV/AIDS punna rate aia a punna sangte a awm a, chung zingah chuan Mizoram pawh a la tel thu sawiin, hei hi thil ngaihtuahawm tak a ni, a ti a. A dona kawngah pawl hrang hrang te inkara thawhhona chak zawk kan mamawh takzet a, chumi atan chuan theihtawp kan chhuah tlana kan theihna zawng zawng nen hma kan lak a tul a ni, a ti. Nimin-a he hun hmanna ah hian Alliance India chuan Mizorama HIV/AIDS dona kawnga thawk mek pawl hrang hrangte sawmin chak zawka hma lak dan tur kawng hrang hrang te an sawipui a ni.