Chanchin thar thenkhat :

Sawrkar hmalakna duhlo

Ram Danpui siamthat vawi 125-na, 125th Constitution Amendment Bill 2019-a Autonomous District Council ten thuneihna lian zawk an neihtheih nana Sixth Schedule siamtha tura hmalakna kal mekah State Sawrkar in a dodal zawnga ngaihdan a thlen duhloh lantirna nimin khan Lawngtlai leh Chawngte-ah neih a ni a. Lawng-tlai-ah chuan Congress, BJP leh ZPM huaihawtin he hun hi hman niin Hnam hnuaihnung zawkten dinhmun sang zawk an chuankai nan a kawng daltu dodalna ah MNF Party an tello chu mak an tih thu an sawi a, Mizoram Sawrkar chuan Autonomous District Council ten kawng hrang hranga thu-neihna sangzawk an neih theihna tura Sawrkar laipui a ngenna an thlen chu a vaiin a dodal vek nia sawiin, Mizoram Sawrkar in Autonomous District Council ten thuneihna sang zawk an neih theih nan a ngenna an thlen, State Sawrkar in ngaihdan a ziakna copy chu an hal bawk a ni.


Kumthar ah SEDP kalpui tum

Chief Minister Zoramthanga chuan sawrkar kumthar ah SEDP Project kalpui an tum tih nimin a thuthar thehdarhtute a kawmna ah sawiin, State Budget atang leh Funding chi hrang hrang atanga kalpui tum anih thu leh cheng vbc. 200 atanga 300 inkarah SEDP project kalpui an tum tih a sawi. Chief Minister chuan tun term chhungin Aizawl khawpuia Assam Rifle sawnchhuah hman an beisei tih a sawi bawk.


Court in thiamloh chantir

Nikum December 9 zan-a Dr. Laltanpuia (43) s/o John Lianzauva (L), Kulikawn thihna chungchangah Aizawl District Court chuan a nupui Mary Zothangsangi (38) chu tualthattu ah ngaiin IPC Section 302 leh MLP Act Section 6(2) tlawhchhanin thiamloh a chantir a, tunkar Ningani khian a hrem dan tur puan a ni ang. Aizawl Hospital neitu zinga tel Dr. Laltanpuia hi nikum December 9 zan dar 10:00 vel khan an In-ah mi kut tuar ni ngeia hriatin a boral a, chemte a vihhlum nia hriat a ni bawk.


MP (LS) in Minister hmu

Mizoram Lok Sabha MP C. Lalrosanga chuan nimin khan Parliament House, New Delhi-a a pisa-ah Communications, Railways, Electronic & IT Union Minister Ashwini Vaishnav hmuin, Mizoram mamawh thenkhat a sawipui. He hunah hian Lok Sabha MP chuan inbiakpawhna leh Internet Connectivity that tawk loh thute Minister chu hrilhin, a that lohna laite, a bikin ramri hrul hmunahte BSNL leh Company dangte network leh signal tihthat a tul thu a hrilh a. Ashwini Vaishnav chuan Mizoram leh hmarchhak State dang thenkhat harsatna leh mamawhte enfiah turin Central sawrkar Official-te a tirh tur thu a lo hrilh a ni.

Phai lam leh Mizoram inkara Dak-a thil thawn a chak tawk loh thin thu pawh sawiin Lok Sabha MP chuan hma la turin Communications Minister chu a ngen a. Mizorama Rel kawng phah mek chungchangah Railways Minister ni bawk Vaishnav chuan Mizoram-a Rel kawng phahna tura Leidawh leh leiverh siam hna a kal chak zawk theih nan Bairabi atanga Sairang thlenga Rel kawng phahnaa tualchhung harsatna awm thinte lo enpui turin MP chu a sawm bawk.


JAC on ILRFD in sawrkar ngen

JAC on Inner Line Reserved Forest Demand chuan Mizoram sawrkar chu Assam State nen ramri buai chungchangah chak taka hma la turin an ngen tih an sawi. Nimin-a Aizawl Press Club a thuthar thehdarhtute an kawmna ah JAC on IL-RFD Chairman Lianzuala chuan 509 sq. Miles Inner Line Reserved Forest chu Mizoram (Lushai Territory) chhung ngei a awm a ni tih sawiin, hei hi Mizoram sawrkar in a enkawl ve theih nan Central sawrkar-ah a rang thei ang berin sawrkar in dilna siam a thawn nghal turin an ngen tih a sawi a. Kum 1972 hmalam a Assam in Inner Line Reserved Forest chhung atanga Chhiah an pek thin an pek tak loh chu Mizoram sawrkarin Assam sawrkar ah leiba a pung nen dil nghal turin an phut tih a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man