Chanchin thar thenkhat :

Joint NGO atangin inhnukdawk

RT-PCR Lab for Chhimbial te chuan Lunglei a RT-PCR Laboratory din tura YMA Sub-Hqrs. Lunglei kaihhruaina hnuaia hmalak hona, Joint NGO atangin an inhnuk dawk tih an puang. RT-PCR Lab for Chhimbial te hian thuchhuah siamin May ni 29, 2021 atangin Mizoram chhim lam District te tan RT-PCR Laboratory din a nih theih nan hma an la tan tih sawiin, Joint NGO anga hmalak thaa hriain thawhhona ah an tel thu an sawi a. “Mizoram Sawrkar insawifiahna ngaithla a pawmsak zel a, ngaichang zel ringawt tura NGO Co-ordination anga hmalakna hi awmzia a awm dawn chuangin kan hre ta lova, Vawiin Dt. 04.12.2021-ah hian Joint NGO anga kan hmalakna atang chuan kan inhnukdawk ta,” an ti a ni.

Khawpui fai endik mek

Urban Development & Poverty Alleviation Department hmalakna a Mizoram khawpui fai inelna kalpui mekah khawpui hrang hrangte dinhmun enfiah mek a ni a. Faina endiktu Team hi Group 3-ah inthenin Group-I ten Aizawl khawpui an endik a, Group-II in District Capital endikin Group-III ten Urban Town an endik mek bawk. District khawpui endiktute hian Mamit, Kolasib leh Saitual endik tawhin Inrinni khan Champhai an pan a ni. Urban Town endiktu te hian khaw 8 Sairang, Leng-pui, West Phaileng, Kawrthah, Zawlnuam, Bairabi, Vairengte leh Kawnpui te an endik tawh a, tunkar hian khawchhak lam tlangdung lam an pan leh dawn a ni.

Raltlan dahna tur ruahman

Myanmar atanga Mizoram-a raltlan rawn lut an awm reng avang leh Champhai khawpui chhungah raltlan te a hlawma dahna tur a awm mumal tawh loh avangin Inrinni khan Champhai Sub-Hqrs. YMA hmalakna in Champhai Zote-a ITI building chu raltlan dahna atan tihfai a ni a, he hunah hian Branch 4 thawkin mi 1000 vel dah theih beisei an ni. Champhai Sub-Hqrs. YMA huamchhungah hian raltlan 6000 vel an awm mek a ni.

Cherhlun to Tiau kawng hawng

South Tuipui bialtu MLA leh Health Minister Dr. R. Lalthangliana chuan Inrinni khan BADP 2019-2020 Additional Fund atanga cheng nuai 100 senga laih Cherhlun to R. Tiau Road chu a hawng a, he kawng hi kum 20 kaltaa RD Minister a nih lai khan cheng nuai thuma bul an tan a nih thu sawiin, “Economic Road emaw, Potential Area Connectivity tih hial tura kawng pawimawh a ni,” tiin Nul-an chitin reng leh Mau thlenga kan chawkluhna tur kawng pawimawh a nih thu a sawi bawk. He kawng hawn tak hi KM 11-a thui niin Hnahthial BDO chuan hnathawh hi a enkawl a ni. Dr. R. Lalthangliana hian Zirtawpni khan MLA Fund cheng nuai 10 chuang senga sak Thingsai-a Rest House sak chu a hawng bawk a ni.

Union Minister-ah thlen

BJP Mizoram Pradesh hruaitute chu Zir-tawpni zan khan Ministry of Social Justice and Empowerment-a Minister of State Ramdas Athawale chuan zanriah buatsaih sakin inkawmna an nei a, a Ministry hnuaia Mizoram mamawh hrang hranga a puih theih dan tur leh 6th Schedule Amendment-2019 a Mizoram chhunga ADC pathum ten kan thenawm State 3 - Assam, Meghalaya leh Tripura dinhmun ang an chan ve theih nana hmalakpui turte, Burma ram buai avanga Burma atanga Mizoram raltlanten buaina an tawh lohna atana hmalakpui a, a Ministry atanga tanpuina awm thei hmanga tanpui turin a ngen a. Mizoram harsatna tawh ah te hian theihtawp a lo chhuah tur thu a sawi a ni.