Chanchin thar thenkhat :

Raltlan te tawng zirtir tum

Mizo Students’ Union (MSU) General Hqrs. chuan nimin khan Aizawl-ah Executive Meeting neiin Myanmar ram buaina avanga Myanmar atanga Mizoram-a rawn chhukte chu tawng hrang hrang hmang an nih avangin anmahni pawh inbe hlei thei lovin an awm tih sawiin, Krismas hunpui chawlh laiin Myanmar ram buai avanga Mizo-ram rawn belte tan Mizo tawng inzirtirna hun buatsaih ni se an ti. Hei bakah hian MSU chuan Health Care Scheme chungchangah April 2021 hnu lama Bill pek la ni lo leh bill cheng nuai 3965 la tang chu hriatthiam har an tih thu an sawi a. Chumi piah lama kum 2021–2022 atana Budget-a sum dah a ni lo chunga sum senga mipuite in-register-tir an ni chu mipui zahlohna lian tak ah an ngaih thu sawiin, Mizoram sawrkar chu insawifiah tura an phut thu an sawi bawk.

Tawipui tan Ambulance hlan

Mizoram-a hnathawk a awm mek ABCI Infrastructures Pvt. Ltd. ten CSR kaltlanga cheng nuai 7 an ruahman atanga Ambulance an lei chu nimin khan Lunglei South bialtu MLA Dr. K. Pachhunga chuan Tawipui PHC-a MO Dr. C. Lalhlimpuii hnenah a hlan a, Ambulance hlanna inkhawm Lunglei DC Conference Hall-a neih ah Dr. K. Pachhunga chuan ABCI Infrastructures Pvt. Ltd. (Pkg-6) hotuten cheng nuai 7 man hu Ambulance Maruti Suzuki Eeco Van Tawipui PHC hman atan an hlan chu lawmawm a tih thu a sawi a, Tawipui PHC building pawh cheng nuai 200 vel a sak thar tur a ruahman a nih thu a sawi bawk.

Hnimhlum pekna khawl hlan

Lunglei HPC Vice Chairman Lawmawma Tochhawng MLA in MLA Fund atanga cheng 5,50 senga a lei Hnimhlum pekchhuahna khawl, ‘GE Carestation 30 Anaesthesia Machine’ chu nimin khan Christian Hospital Serkawna (CHS) hman turin a hlan a, CHS aiawhin Medical & Health Department, BCM-a Director Dr. Lal-ramzauva chuan a dawng a ni.

Phullem phah hawng

NEC sum cheng nuai 682.90 senga Hnah-thial Block Sports Committee Ground No. 2-a Phullem phah chu nimin khan bialtu MLA leh Health Minister Dr. R. Lalthangliana chuan a hawng a, Health Minister chuan Hnahthial District chu infiamna kawnga mi hmingtha chhuah tamna a nih thu sawiin, “Sports hi mi tam takin kan eizawnna hmun tur a ni tih hriain Mizoram sawrkar Cabinet-ah Industry pakhat angin kan pass tawh a, chu chuan thil tam tak a keng tel a ni,” a ti. He hun hi Sports Minister Robert Romawia Royte chuan khual zahawm niin a hmanpui bawk. Hnahthial Block Sports Committee Ground No. 2 phullem phah hi FIFA pawmpui ACT Gobal Company, USA siam a ni

P&E Minister in a bial fang

P&E Minister leh Tawi bialtu MLA ni bawk R. Lalzirliana chuan nimin khan a bial chhunga Thingsulthliah, Tlangnuam, Seling leh Tuikhurhlu te tlawhin khawtlang hruaitute nena thutkhawm an neih ah sawrkar hmalakna hrang hrangte leh ruahmanna te a sawipui a. Jal Jeevan Mission hnuaiah Thingsulthliah, Tlangnuam leh Seling khua te tana tui Pump chhohna tur sanction leh hnathawhna tur order te buatsaih fel thawkhat tawh a nih thu tarlangin kumthar lamah chuan hna tan theih tawh tura beisei a ni tih a sawi bawk. P&E Minister hian khawtlang hruaitute hmalak te a chhuanawm thu sawiin, an huamchhunga chhungkaw harsa te hnena sem turin pawisafai a hlan nghal bawk a ni.

MNF sawrkar tha nilo niin MPCC in an sawi

Mizoram Pradesh Congress Committee (MPCC) hruaitute chuan nimin khan Aizawl Press Club-ah thuthar thehdarhtute kawmin tunhnaia Mizoram a thil thleng hrang hrangte ngun taka thlirin MNF sawrkar kan hrawn mek chu sawrkar tha a nih loh zia a lang chho zel niin an sawi a, “Hmasawnna hna thawhna tam zawkah thil dik lo inphum haichhuah tur a awm rengte hian MNF-in dik an tlin loh zia a tarlang chiang hle a ni,” tiin Congress Party chuan sawrkar tha siam an tum thu leh mipui tan rintlak an nih zia lantir tumin an insiamtha mek bawk niin an sawi.