Mizoram-ah hri kai hmuhchhuah tlahniam zel

Mizoram-ah COVID-19 hri kai hmuhchhuah an tlem hret hret a, niminpiah khan Sample 3281 enfiah atangin hri kai mi 275 hmuhchhuah niin Sample enfiah atanga za zela 8.38 te chuan hri an kai a, hri kai enkawllai pawh an tlem zel bawk.

Niminpiah khan ZMC-a RT-PCR Laboratory-ah Aizawl District atanga Sample lak 509 enfiah niin heng atang hian hri kai mi mi 52 hmuh an ni a, Veng leh khua 26 ami te niin Veng mal-a hri kai hmuhchhuah tamna an awmlo a ni. Fluorescent Immunoassay Test hmangin Aizawl District-ah Sample 40 enfiah ni bawkin hri kai mi 3 hmuh an ni a, an vai hian Aizawl khawpui chhung ami an ni bawk.

Siaha leh Lawngtlai tihloh District dang-a TrueNat Laboratory-ah niminpiah khan Sample 116 enfiah ni bawkin hri kai mi 10 hmuh an ni a, Aizawl, Lunglei, Kolasib, Serchhip leh Khawzawl District atangin hri kai mi pahnih theuh hmuh an ni.

Rapid Antigen Test hmangin niminpiah khan Sample 2616 enfiah ni bawkin hri kai mi 210 hmuh an ni a, an zinga 79 chu Aizawl District-a hri kai hmuh te niin Champhai District-ah 34, Lunglei District-ah 26, Serchhip District-ah 20, Mamit District-ah 14, Saitual District-ah 12, Hnahthial District-ah 8, Lawngtlai District-ah 7, Kolasib District-ah 5, Khawzawl District-ah 3 leh Siaha District-ah hri kai mi pahnih hmuh an ni bawk.

Nimin khan tlai dar 5:00 thlengin Mizoram-ah hri kai enkawl dam mi 368 an awm belh leh a, heti hian nimin tlai dar 5:00 thleng khan Mizoram-a hri kai hmuhchhuah chu 1,35,450 niin an zinga 1,31,545 te chu enkawl dam an ni tawh a, hri kai hmuhchhuah atanga za zela 97.00 te enkawl dam ni tawhin hri kai enkawllai 3404 an la awm mek a. Mizoram-a hri kai zingah nizan hmasa khan mi pakhat boral belin nimin khan tlai dar 5:00 thlengin hri kai zingah boral an awm belh lova, Mizoram a hri kai zingah mi 501 an boral tawh a ni.