Union Finance Minister hova Meeting-ah CM tel

Union Finance Minister Nirmala Sitharaman-i hovin niminpiah khan State hrang hrang leh Union Territory hruaitute chuan Virtual Meeting neiin Mizoram Chief Minister Zoramthanga pawh CM Office atangin a tel a, ei leh bara hmasawnna nawr kal tura pawimawh a tih leh Mizorama hmalak theih awmte a sawi a ni.

Union Finance Minister chuan hripui leng chu ram pum economy in tuar phah mahse, theihtawpa sawrkarin hma a lak zarah hrileng thawh hnihna hnuah beisei phak bakin tehfung hrang hrangah ram-in hma a sawn chhoh thu leh, hripui len hmaa kan dinhmun ngai han awh hialna pawh Sector thenkhatah a awm thu a sawi a. He hmasawnna hi chawmnung zel turin State tin ten theihtawp an chhuah ve a pawimawh thu a sawi a. Awlai zawka pawnlam mi ten investment an tih theih nana State te inhawng tura chahin, sawrkar laipui pawhin economy hnarkaitu atan hmasawnna ruhrel din leh investment ah nasa taka tan a lak thu a sawi bawk.

He hunah hian Chief Minister Zoramthanga chuan sawrkar laipuiin India hmarchhak State te tan Gross Budgetary Support 10% a pek tur, harsatna chhan hrang hrang vanga la dawn si loh chu a chanve tal pekchhuah a nih chuan hmarchhak State ten hmasawnna hna an thawhnaa puitu tha tak leh, ram economy-ah pawh an thawhhlawk phah ngei tur thu a sawi a. Heng bakah hian Mizoram bikah chuan hmasawn hna thawh tur hrang hrang zinga langsar ber leh tangkai tak tur, Bamboo Development a nih chungchang a sawi a. Amaherawhchu Link Road tha a awmloh avangin Plantation hmun atanga Factory thlen tur chuan hmun tam takah chuan Mau hralhna man aia a phur man a to zawk avangin a hlawk theihloh thu a sawi a. Hemi anih avang hian Link Road siam a pawimawh thu a sawi bawk. He hunah hian Chief Minister hi Chief Secretary Dr. Renu Sharma leh Officer pawimawh thenkhat ten an tawiawm a ni.

Comments

Popular News (Last 30 Days)

Serchhip DCSO sawn a ni