Ruahsur vangin Leilet nei leh Thlai chingtute an buai

Tunhnaia ruahsur nasa avangin Serchhip Mat phai-a Leilet neitute leh Thlasik thlai chingtute chuan harsatna nasa tak an tawk.

Zirtawpni kalta atanga ruah tam tham tak sur avang hian Serchhip Mat phai-a buh chingtute chuan am buh seng chungchangah harsatna an tawk tih nimin a Zawlpui phai tlawhtu LENKAWL an hrilh a, tunah hian Zawlpui phai a buh chingtute chuan an buh hi an at deuh vek tawh tih sawiin, amah-erawh chu an leilet-ah Buhphal an la dah thu leh buh vuak loh an la dah tam thu an sawi a. Heng te hi tuilian hian nasa taka chimin hei hi awlsam taka a to thin avangin a theih anga an buh hi vuak thuai thuai a tul thu leh hei pawh hi phoro a nih loh chuan buh hian a chhiat phah theih thu an sawi a, tunah hian a theih ang anga an buh seng-hawi hna hi an thawh thu an sawi a. Buh vaw hman te pawhin Leilet-ah buh an la dah nasat avangin heng te pawh hi tuilian in a chim thu leh Silpauline hmanga khuh hul ngawt chu buh hi a to duh bawk si avangin thil tih chi a ni lo tih sawiin, buaina an tawh nasat thu an sawi a ni

Hei bakah hian Thlasik thlai chingtute pawhin tun tum ruahsur nasa avang hian harsatna an tawk tih LENKAWL an hrilh a. Kumin a Thla-sik thlai chin tur hian thla hmasa lamah Zikhlum an lo kuitiah tawh thu sawiin, hei hi tuilian in a tihchhiat sak hnuah an kui tha lehin hei hi tunah hian tuilian hian a tihchhiat sak leh tih an sawi a, hei mai bakah hian Antam leh thlai dang an seng theih tawh te pawh tuilian hian a chim avangin seng chhunzawm theihloha a awm thu an sawi a. A kung nei thlai te erawh tuilian hian a tichhe nasa lo tih an sawi bawk. Tun tuma ruahsur nasa avanga Leilet neitute harsatna tawh hi Vawiin hian Serchhip DAO hovin tualchhung thuthar thehdarhtute chuan an tlawh leh dawn a, hei bakah hian Agriculture Department chuan District chhung khaw hrang hranga harsatna thleng hi a hmuna tlawh tur an inruat bawk a ni.

Comments

Popular News (Last 30 Days)

Serchhip DCSO sawn a ni