Inkhawmna a zai chungchang kaihhruaina siam

Mizoram sawrkar in COVID-19 hri leng avanga inkaihhruaina a hman mekah Sakhaw Biak In leh inkhawmna a zai leh zai loh chungchang ah State Level Expert Team on COVID-19 Management (SLETOCOM) recommendation-a tarlan te zawm tur a ni tih a tarlang.

Hemi chungchang ah hian Mizoram State Disaster Management Authority-a State Executive Committee Chairman leh Chief Secretary Dr. Renu Sharma chuan hriattirna tichhuakin State Level Expert Team on COVID-19 Management (SLETOCOM) recommendation pawh tarlan nghal a ni a, hetah hian WHO Warning Level 4 kan ni tih tarlangin, World Health Organisation (WHO) in Transmission Thresholds (Hri kaidarh tam lam tehfung) a siam Level hrang hrang Level 1 (Green colour-Low risk), Level 2 (Yellow colour/Medium risk), Level 3 (Orange colour/High Risk) leh Level 4 (Red color/Extreme risk)-ah pawh Mizoram chu Level 4-ah kan awm thu a tarlang a, District mal te te-a teh pawhin Level 4-ah vek kan la awm thu leh heng te avang hian puipunnaah zalen lutuk thei kan la ni lo tih a tarlang a ni.

Hei bakah hian mipui punkhawmna chi reng reng- Kohhran inkhawm, sawrkar function, Political Prty punkhawm, NGO punkhawm, Mitthi vui, Inneih Inkhawm, Birthday leh Anniversary lawm leh a dangte ah a hmuna leng zat chanve (50% seating capacity) aia tam mipui punkhawm a la him rihlo tih pawh tarlan a nih thu te, COVID hrik pai atangin, au leh zai hian tawng satliah aiin ka leh hnar atangin virus a chhuak nasa bik hle tih te, Hmai tuamna hmang chunga tawng leh zai hian nasa takin hri darh tur a veng thei ngei a. Amaherawhchu, hmai tuam chunga uar taka zai hian COVID hrik pai boruak 'aerosol' chhuak erawh a veng hneh vek lo tih hi mithiam ten hmun hrang hranga an zirchiannaah hmuhchhuah a ni tih te tarlan a ni a. Mipui punkhawmna-ah SOP tha taka zawm a nih theih nan a huaihawttu-in mawh a phur ang tih pawh thuchhuah ah hian tarlan a ni bawk.